काठमाडौँ : कोभिड –१९ को सङ्क्रमण रोकथाम गर्न काठमाडौँ महानगरपालिकाले बिहीबार काठमाडौँका बिभिन स्थानमा कीटनाशक औषधि (डिसइन्फेक्सन स्प्रे) छर्किएको छ । काठमाडौँको मिनभवनस्थित निजामती अस्पताल बाहिर तथा नागढुङ्गा–कलङ्की सडकखण्डमा कीटनाशक औषधि छरियो । काठमाडौँ प्रवेशको मुख्यद्वार नागढुङ्गा–कलङ्की सडकखण्डमा कीटनाशक औषधि छरिएको छ । चन्द्रागिरि नगरपालिका र थानकोटस्थित नेपाली सेनाको टोलीले आज नागढुङ्गादेखि कलङ्कीसम्मको मुख्य सडकमा ‘हाइड्रो क्लोराइड’ नामक कीटनाशक औषधि छर्केका हुन् ।
नगरपालिकाका प्रवक्ता हरिभक्त महर्जनले कोरोना रोग नियन्त्रणका लागि केही हदसम्म सहयोग पुग्ने उद्देश्यले नागढुङ्गादेखि कलङ्कीसम्मको मुख्य सडकमा कीटनाशक औषधि छर्किएको जानकारी दिनुभयो । “कीटनाशक औषधि छर्किएसँगै मुख्य राजमार्गमा हुने कीटाणु उड्न पाउँदैनन्”, उहाँले भन्नुभयो । नगरवासीलाई घरभित्र बस्न आह्वान गर्दै आज बिहानैदेखि नगरपालिकाभित्र माइकिङ गरिएको उहाँले जानकारी दिनुभयो । नगरपालिकाले विदेशबाट आएका व्यक्तिको लगत सङ्कलनसमेत अगाडि बढाएको छ ।
_20250109132116.jpg)
