काठमाडौं। नेकपा (माओवादी केन्द्र) का नेता एवं पूर्वमन्त्री सुदन किरातीले प्रधानमन्त्री केपी शर्मा ओलीले हिन्दु गणतन्त्रको निम्ति जोडबल गरिराखेको टिप्पणी गरेका छन् ।
बिहीबार संसद् भवन परिसरमा सञ्चारकर्मीहरुसँग संक्षिप्त कुराकानी गर्दै उनले प्रधानमन्त्री ओलीको विगत र वर्तमानको गतिविधिले उनी हिन्दु गणतन्त्रको पक्षमा रहेको पुष्टि गर्ने बताएका हुन् ।
प्रधानमन्त्री ओली, उनको दल एमाले र नेपाली कांग्रेसको पछिल्ला गतिविधिले राजतन्त्रवादीको अराजकतामा मलजल गरिरहेको नेता किरातीको दाबी छ । प्रधानमन्त्री ओलीले अझ सडकमा अराजकता बढोस् भन्ने चाहना राखेको पनि उनको आशंका छ ।
‘उहाँ (ओली) हिन्दु गणतन्त्रको पक्षमा जानको निम्ति बल गरिराख्नु भएको छ । उहाँले गणतन्त्रको लागि नेपालमा आन्दोलन चलिरहँदा नेपालमा सम्भव छैन भनेको र पछि संघीय लोकतान्त्रिक गणतन्त्रलाई संविधानमा लिपीवद्ध गर्दा पनि हावाहुरीको कारणले गरेको हो । यो हुनेवाला थिएन भनेर उहाँले भन्नुभएको थियो । हिजोको पृष्ठभूमि र आजको गतिविधिलाई जोड्दाखेरी त्यही कुरा प्रमाणित हुन्छ । राजतन्त्रवादीहरु नविन सम्झौता गरौं भनिराखेका छन् । नेपाली कांग्रेसको तर्फबाट संविधानको संशोधनको नाममा गरिएको नौटंकी अर्थात् प्रतिवेदनमा हिन्दु गणतन्त्र भनेर लेखिएको छ,’– नेता किरातीले भने ।
साथै, समाजवादी मोर्चाको भोलिको खबरदारी सभा प्रतिगमन, भ्रष्टाचार र बेथितिको विरुद्धमा रहेको उनले बताए । उक्त आन्दोलन शान्तिपूर्ण हुने पनि उनले विश्वास व्यक्त गरे ।
