काठमाडौं। नेपाली कांग्रेसको १५औं महाधिवेशनअन्तर्गत पदाधिकारी निर्वाचनमा विशेष महाधिवेशन पक्षधर नेताहरूकै वर्चस्व कायम भएको छ।
उपसभापति र महामन्त्री पदको अन्तिम निर्वाचन परिणामअनुसार सभापति गगन थापा नेतृत्वको टोलीबाट विशेष महाधिवेशनमा जिम्मेवारी पाएका अधिकांश नेताहरूले नियमित महाधिवेशनबाट पनि जित हासिल गर्दै नेतृत्वमा निरन्तरता पाएका हुन्।
उपसभापतिमा चन्द्र भण्डारी, मधु आचार्य र विनोदकुमार चौधरी तथा महामन्त्रीमा प्रदीप पौडेल, उदयशमशेर राणा र डिला संग्रौला निर्वाचित भएका छन्। यसअघि सभापतिमा गगन थापा मतदानबाट निर्वाचित हुँदा वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसाल निर्विरोध निर्वाचित भइसकेका थिए।
उपसभापति (खुला):
चन्द्र भण्डारी: ३,७३५ मत (विजयी)
मधु आचार्य: २,३४२ मत (विजयी)
गोविन्द भट्टराई: १,७५२ मत
सुरेन्द्रराज पाण्डे: १,६७३ मत
धनराज गुरुङ: १,५९६ मत
दीपक गिरी: ९२३ मत
चन्द्रमोहन यादव: ७६० मत
उपसभापति (समावेशी):
विनोदकुमार चौधरी: १,७४५ मत (निकटतम प्रतिस्पर्धी जीवन परियारलाई ८७ मतले पराजित गर्दै विजयी)
जीवन परियार: १,६५८ मत
फरमुल्लाह मन्सुर: १,१४४ मत
सीता गुरुङ: १,११२ मत
रञ्जित कर्ण: ५६२ मत
महामन्त्री (खुला):
प्रदीप पौडेल: ४,१९४ मत (विजयी)
उदयशमशेर राणा: २,३३० मत (विजयी)
सुनिल शर्मा: २,२५७ मत
गुरुराज घिमिरे: १,५१३ मत
नैनसिंह महर: १,१३४ मत
अमरसिंह पुन: १,१२५ मत
शंकर तिवारी: १२३ मत
सन्तोष उपाध्याय: ९७ मत
महामन्त्री (महिला):
डिला संग्रौला: ३,११८ मत (महालक्ष्मी उपाध्याय ‘डिना’लाई २५४ मतले पराजित गर्दै विजयी)
महालक्ष्मी उपाध्याय ‘डिना’: २,८६४ मत
रीता खनाल: ८०४ मत
प्रदीप पौडेल: १४औँ महाधिवेशनमा तत्कालीन सभापति शेरबहादुर देउवा पक्षबाट महामन्त्रीको उम्मेदवार बनी पराजित भएका पौडेल, त्यसपछि नेतृत्व रूपान्तरणको अभियानमा गगन थापा समूहसँग जोडिएका थिए। विशेष महाधिवेशनबाट महामन्त्री बनेका उनी यसपटक सर्वाधिक ४,१९४ मतसहित पुनः निर्वाचित भएका हुन्।
उदयशमशेर राणा: देउवानिकट राजनीतिबाट विशेष महाधिवेशनको क्रममा थापा नेतृत्वसँग जोडिएका राणा सो क्रममा सहमहामन्त्री बनेका थिए। नियमित महाधिवेशनमा भने उनी महामन्त्री पदमा पदोन्नति भएका छन्।
डिला संग्रौला: कांग्रेसको संशोधित विधानअनुसार पहिलोपटक व्यवस्था गरिएको महिला महामन्त्री पदमा निर्वाचित हुँदै संग्रौलाले इतिहास रचेकी छन्। सहमहामन्त्री निर्वाचित भइसकेकी महालक्ष्मी उपाध्याय 'डिना'लाई पराजित गर्दै उनी कांग्रेसको पहिलो महिला महामन्त्री बनेकी हुन्।
चन्द्र भण्डारी र मधु आचार्य: नेविसंघको पूर्वउपाध्यक्ष एवं लामो समयदेखि केन्द्रीय सदस्य रहँदै आएका पुराना नेता चन्द्र भण्डारी यसपटक उपसभापतिमा निर्वाचित भए। गत पुसमा विशेष महाधिवेशनको हस्ताक्षर अभियानको अगुवाइ गरेका मधु आचार्यले पनि उपसभापतिमा सफलता हासिल गरे।
विनोदकुमार चौधरी: २०७४ सालमा कांग्रेस प्रवेश गरेका उद्योगी विनोद चौधरीले राजनीतिमा छोटो समयमै ठूलो छलाङ मारेका छन्। २०७८ को १४औँ महाधिवेशनमा केन्द्रीय सदस्य बनेका चौधरीले ५० औँ वर्ष राजनीति गरेका पुराना नेताहरूलाई पछि पार्दै कांग्रेस बनेको नौ वर्षमै उपसभापति पद हासिल गर्न सफल भए।
चन्द्र भण्डारी (उपसभापति): अमूल्य मत दिएर विजयी गराउने महाधिवेशन प्रतिनिधिहरूप्रति आभार व्यक्त गर्दै उनले विश्वासको शिर कहिल्यै झुक्न नदिने र 'म होइन, हामी र हाम्रो' भन्ने भावनाका साथ अघि बढ्ने प्रतिबद्धता जनाएका छन्।
मधु आचार्य (उपसभापति): पार्टीबाहिर रहेका लोकतन्त्रवादी र जेन-जी (Gen-Z) पुस्तालाई कांग्रेसमा जोड्न पहल गर्ने तथा महाधिवेशन प्रतिनिधिहरूले अनुमोदन गरेको रूपान्तरणको एजेण्डालाई पूर्ण निष्ठाका साथ पूरा गर्ने विचार प्रकट गरेका छन्।
प्रदीप पौडेल (महामन्त्री): प्राप्त मतलाई आफ्नो राजनीतिक जीवनको ठूलो पुँजी मान्दै पौडेलले पार्टीलाई बलियो, गतिशील र भावनात्मक रूपमै एक ढिक्का बनाउने अभियानमा पूर्ण समर्पित भएर लाग्ने अठोट व्यक्त गरेका छन्।
उदयशमशेर राणा (महामन्त्री): निर्वाचनको नतिजालाई हार-जितको रूपमा नलिई जिम्मेवारीको रूपमा बुझ्नुपर्ने धारणा राख्दै राणाले सभापति गगन थापाको नेतृत्वमा अब सिंगो पार्टीलाई स्थानीय निर्वाचनको तयारीमा होम्ने र महाधिवेशनमा सहभागी नभएका देउवा पक्षलाई समेत सहमतिमा लिएर अघि बढ्ने नीति प्रस्तुत गरेका छन्।
डिला संग्रौला (महामन्त्री): इतिहासमै पहिलो महिला महामन्त्रीको जिम्मेवारी सम्हाल्दै संग्रौलाले युवा पुस्ताको चाहनाअनुरूप पार्टीलाई आधुनिक र गतिशील बनाउन आफ्नो सम्पूर्ण ध्यान केन्द्रित गर्ने स्पष्ट पारेकी छन्।
