काठमाडौं। तराई मधेशका दुई प्रभावशाली दलबीच पार्टी एकीकरण हुने भएको छ। डा. सीके राउत नेतृत्वको जनमत पार्टी र रञ्जिता श्रेष्ठ नेतृत्वको नागरिक उन्मुक्ति पार्टी (नाउपा) बीच पार्टी एकता हुन लागेको हो । यसका लागि नेताहरू अन्तिम गृहकार्यमा छन्।
नाउपाका संरक्षक रहेका रेशमलाल चौधरीले पार्टी एकता प्रक्रिया अन्तिम चरणमा पुगेको जनाएका छन्। शनिबार काठमाडौंमा आयोजित पत्रकार सम्मेलनमा उनले जनमत र नाउपाबीच पार्टी एकीकरण हुन लागेको जानकारी दिए। एकीकृत पार्टीले पहिचानको मुद्दाका लागि सशक्त संघर्ष गर्नेसमेत उनले बताए। चौधरीका अनुसार पहिचानको मुद्दामा डा. बाबुराम भट्टराईको पनि साथ रहनेछ ।
नेपाल समाजवादी पार्टी (नयाँ शक्ति) का अध्यक्ष एवं पूर्वप्रधानमन्त्री भट्टराईले आफूलाई ‘तपाईंहरू पहिचानको मुद्दा उठाउनुस्, टाउकोमा राख्नुप¥यो भने म मेरी छोरी मानुषी पठाइदिउँला’ भनेर वचन दिएको उनले बताए । ‘अब हामी एक हुन्छौं, एक हुनुपर्छ । जनमत र नागरिक उन्मुक्ति पार्टी, पहिचानको मुद्दा, डा. बाबुराम भट्टराईले भन्नुभएको छ तपाईं दुई जनाले उठाउनुस्, टाउकोमा राख्नुप¥यो भने म मेरी छोरी मानुषी पठाइदिउँला भनेर,’ उनले भने ।
यसअघि जनमतका अध्यक्ष डा. सीके राउतले समेत दुई पार्टीबीच एकीकरण हुने बताएका थिए । तराई मधेशमा एक सशक्त पार्टीको आवश्यकता रहेको बताउँदै उनले पूर्वी तराई मधेशदेखि पश्चिमसम्म अब आफूहरूको प्रभाव बढ्ने बताए । साथै, जनताको आवाज र माग सशक्त रूपमा उठाउनका लागि समेत पार्टी एकता आवश्यक रहेको उनले जनाएका छन् ।
एकीकृत पार्टीको नाम जनमत पार्टी नै रहनेछ । चुनाव चिह्न ढकिया हुनेछ भने पार्टी अध्यक्षमा राउत रहनेछन् । पार्टीको संरक्षकमा चौधरी र सहअध्यक्षमा श्रेष्ठ हुने बताइएको छ । दुवै पार्टीका नेताहरूले पार्टी एकता छिटै हुने र त्यसका लागि आफूहरू आन्तरिक गृहकार्यमा रहेको जनाएका छन् । यद्यपि पार्टीमा सहअध्यक्ष राख्ने वा अध्यक्ष मण्डल राख्ने भन्ने’boutमा छलफल जारी नै छ ।
२०७५ सालमा गठन भएको राउत नेतृत्वको जनमत र डिल्लीबजार कारागारमै छँदा चौधरीले २०७८ सालमा श्रीमती श्रेष्ठको अध्यक्षतामा गठन गरेको नाउपाबीच यसअघि पनि पार्टी एकताका लागि छलफल भएको थियो । तर, अन्तिम समयमा आएर एकता हुन सकेन । पार्टी एकतापछि एकीकृत पार्टीका १० जना सांसद हुनेछन् । जनमतसँग ६ र नाउपासँग ४ जना सांसद छन् ।
एकीकृत पार्टीको नाम, चुनाव चिह्न, नेतृत्वसहितका विषय लगभग अन्तिम टुंगो लागिसकेको बताइएको छ । एकीकृत पार्टीको पदाधिकारी र केन्द्रीय समितिलगायतका विषयमा छलफल जारी छ ।
जनमतका सचिव बीपी साहका अनुसार जनमतले उपाध्यक्ष अब्दुल खान, प्रवक्ता शरदसिंह यादव, सचिव बालगोविन्द चौधरी रहेको वार्ता समिति गठन गरेको छ । उता नाउपाबाट चौधरीसहितका नेताले छलफल गर्दै छन् । अब नाउपाबाट समेत वार्ता समिति गठन गरेर बाँकी प्रक्रिया टुंगो लगाउने बताइएको छ ।
नाउपाकी अध्यक्ष श्रेष्ठले दुई पार्टीबीच एकता हुन लागेको बताइन् । एकतापछिको नेतृत्वको विषयमा कुनै विवाद नहुने बताउँदै उनले अब छिटै एकताको घोषणा हुने बताइन् । यद्यपि केही विषयमा अझै छलफलको आवश्यकता रहेकाले त्यसलाई समेत टुंगो लगाएर अगाडि बढ्ने उनले बताइन् ।
तराई मधेशमा प्रभावशाली दलको रूपमा रहेको जनता समाजवादी पार्टी नेपाल (जसपा), लोकतान्त्रिक समाजवादी पार्टी (लोसपा) विभाजनका कारण प्रभावहीन भएका छन् । तराई मधेशका दलबीच पार्टी एकता र विभाजन नेपालको कम्युनिस्ट पार्टीजस्तै रहेको छ । छिट्टै एकता गर्ने र छिटै पार्टी विभाजनसमेत गर्ने काम कम्युनिस्ट पार्टीजस्तै तराई मधेशका दलले समेत गर्दै आएका छन् ।
