काठमाडौं । नौ दिन लामो संवादहीनतापछि बिहीवार नेकपाका अध्यक्षद्वय केपी शर्मा ओली र पुष्पकमल दाहाल 'प्रचण्ड'बीच छलफल भयो ।
प्रधानमन्त्री समेत रहेका अध्यक्ष ओलीले नेकपाको समस्या ५ दिनभित्र हल हुने भनी काउन्टडाउन दिएको भोलिपल्टै प्रचण्ड ओलीलाई भेट्न बालुवाटार पुगेका थिए ।
बिहान ११ बजेबाट शुरू भएको भेट दिउँसो ३ बजेसम्म करीब ४ घण्टा चल्यो ।
अघिल्ला छलफलहरूको तुलनामा यो छलफल निकै सकारात्मक बनेको बालुवाटार स्रोतले जानकारी दियो ।
अध्यक्षद्वयबीच सहमतिको खाका तयार पार्ने जिम्मासहित कार्यदल गठन गर्ने विषयमा छलफल भएको छ । कार्यदल गठन गरेर सबै जिम्मा दिन दुवै अध्यक्ष लगभग सहमत छन् ।
कार्यदलमा विष्णु पौडेल, जनार्दन शर्मा लगायतकै नेताहरू रहने स्रोतको दाबी छ ।
बिहीवारको बैठकमा ओलीले पार्टी उपाध्यक्ष वामदेव गौतमले केही दिनअघि राखेकै ६ बुँदे प्रस्तावको पेरिफेरिमा रहेर प्रस्ताव गरेका थिए ।
आफू अध्यक्ष र प्रधानमन्त्री दुवै रहने तर पार्टी सञ्चालनको पूर्ण अधिकार प्रचण्डलाई दिने उनको प्रस्ताव रहेको स्रोतका दाबी छ ।
आवश्यक परे मन्त्री हेरफेर गर्न र महत्त्वपूर्ण निर्णय तथा नियुक्तिमा पार्टीको निर्णय मान्न पनि ओली सकारात्मक छन् ।
तर, कार्यदल बनाएको खण्डमा स्वतन्त्र ढंगले प्रस्ताव तयार पार्ने सक्ने गरी अधिकार दिन लागिएको स्रोतले बतायो ।
स्रोतका अनुसार नेकपामा सहमतिका लागि २ विकल्पमा विभिन्न चरणमा छलफल चलिरहेको छ ।
के–के हुन् दुई विकल्प ?
नेकपामा सहमतिका लागि छलफलमा रहेको पहिलो विकल्प हो, वामदेव गौतमले पेश गरेको ६ बुँदे प्रस्ताव ।
'वामदेव कमरेडले पेश गरेको सुझावको आसपासमै रहेर सहमति खोज्न सकिन्छ कि भन्ने विषयमा छलफल चलिरहेको छ,' बालुवाटार स्रोतले भन्यो, 'अन्यथा दोस्रो विकल्पमा छलफल हुनेछ ।'
यस्तो छ वामदेवको छ बुँदे :
यद्यपि यो विकल्पमा प्रचण्ड भने त्यत्तिकै सहमत हुने सम्भावना न्यून छ ।
त्यस्तो अवस्थामा दोस्रो विकल्पमा जानुपर्ने हुन्छ ।
दोस्रो विकल्पका रूपमा तत्काल महाधिवेशनमा केन्द्रित हुने र केन्द्रीय समितिले तोकेको चैतकै मितिमा महाधिवेशन गर्ने भन्ने विषयमा छलफल चल्दैछ ।
त्यसका लागि केन्द्रीय कमिटी भंग गरेर महाधिवेशन आयोजक कमिटी बनाइने छ ।
महाधिवेशन आयोजक कमिटीको संयोजकको भूमिका प्रचण्डले निभाउने र ओली सरकार सञ्चालनमा केन्द्रित हुने गरी दोस्रो तहका नेताहरूले प्रस्ताव तयार पारेका छन् ।
प्रचण्डलाई यो विकल्पमा सहमतिमा ल्याउनका लागि भित्र अर्को गोप्य सहमति पनि हुनसक्छ, जुन सार्वजनिक गरिनेछैन ।
आगामी महाधिवेशनमा ओली पक्षले अध्यक्षमा प्रचण्डलाई सघाउने छ । केही समयअघि विचारमा पुगेर अड्किएको गाँठो अब भने फुक्ने सम्भावना बढेको छ ।
ओली पक्षले जनताको जनवादलाई स्वीकार्ने छ, जबजका सार र मूलभूत कुरा त्यसमा भित्र समेटिने छन् ।
महाधिवेशनपछि ओलीका लागि एउटा सम्मानित पद व्यवस्था गरिने छ । वरीयतामा उनी अघि हुनेछन्, तर कार्यकारी भूमिका कुनै पनि हुनेछैन ।
मानार्थ नेता वा सर्वोच्च नेता बनाउने गरी प्रस्तावमा छलफल चलिरहेको स्रोतको दाबी छ ।
आगामी महाधिवेशनमा अध्यक्ष पदमा उम्मेदवारी नदिने ओलीले बताइसकेका छन् ।
जुनसुकै विकल्पमा सहमति भएपनि महाधिवेशनपछिको अवस्थालाई समेत हेरेर वृहत् सहमति गर्नुपर्ने पक्षमा प्रचण्ड छन् ।
पढ्नुहोस्, यो पनि :
अबको सहमतिमा महाधिवेशनपछिको तस्वीर समेत आउने सम्भावना प्रबल छ ।
कति सार्वजनिक होला, के गोप्य रहला त्यो भने भविष्यकै गर्भमा छ ।
नछुटाउनुस्,
