काठमाडौं। महाधिवेशन सम्पन्न गरेको करिव १ महिना हुनलाग्दा पनि नेकपा एकीकृत समाजवादीले आफ्नो केन्द्रीय कमिटीलाई पूर्णता दिन सकेको छैन। गत असार १६ देखि २१ गतेसम्म काठमाडौंमा भएको १०औं राष्ट्रिय महाधिवेशनले अध्यक्ष, महासचिव र सम्मानीत नेताबाहेक अरु कुनै पनि कमिटी चयन गरेको छैन।
असार २१ मा भएको सहमति अनुसार एकीकृत समाजवादीले २१ जना पदाधिकारीसहित २९९ जनाको केन्द्रीय कमिटी चयन गर्ने भनेको थियो। तर, आकांक्षीको संख्या बढ्दै गएको हुँदा अहिले फेरि १० प्रतिशत थप्ने तयारीमा पार्टी पुगेको नेताहरुले बताएका छन्। तयारी अनुसार १० प्रतिशत सदस्य थपिएमा केन्द्रीय कमिटीको संख्या ३२९ जनाको पुग्नेछ।
गत असार २१ गते प्रज्ञा भवनस्थित दसौँ राष्ट्रिय महाधिवेशनको हलबाट अध्यक्षमा माधवकुमार नेपाल, महासचिवमा घनश्याम भुसाल र सम्मानित नेतामा झलनाथ खनालसहित ९३ सदस्यीय केन्द्रीय कमिटी सर्वसम्मत घोषणा गरेको सो पार्टीले बाँकी २०६ जना केन्द्रीय सदस्य महाधिवेशन सकिएको १० दिनभित्र चयन गरिसक्ने जनाएको थियो। तर महाधिवेशन सकिएको २० दिन बित्दा पनि केन्द्रीय कमिटीलाई पूर्णता दिन सकेको छैन।
केन्द्रीय कमिटीलाई पूर्णता दिनेबारे छलफल गर्न यसअघि हिजो पनि पार्टीको बैठक बसेको थियो तर, कुनै पनि निर्णय हुन सकेन्। नेताहरुले केन्द्रीय कमिटीमा नराखेमा पार्टी छाड्ने धम्की दिन थालेपछि नेतृत्वपंक्ति अप्ठ्यारोमा परेको नेताहरुले बताएका छन्।
साढे २ वर्षअघि नेकपा एमालेबाट फुटेर नयाँ पार्टी बनेको एकीकृत समाजवादी हाल आएर आफ्नै अस्तित्व जोगाउने चुनौतीबाट गुज्रिरहेको छ।
०७९ को आम निर्वाचनमा तत्कालीन ५ दलीय सत्ता गठबन्धनबाट चुनाव लडेको एकीकृत समाजवादी थ्रेसहोल्ड कटाउन नसक्दा राष्ट्रिय पार्टी पनि बन्न सकेको थिएन।
एकातिर दिनप्रतिदन नेताहरु पूरानै घर एमालेमा फर्किने र अर्कोतर्फ संगठन विस्तारले पनि गति नलिँदा पार्टीको अस्तित्व संकटमा परेको नेताहरु बताउँदा यस्तो अवस्थामा आकांक्षी सबैलाई केन्द्रीय कमिटीमा लगेर हुनसक्ने सम्भावित क्षति रोक्ने प्रयासमा पार्टी लागेको छ । यस्तो हुँदा केन्द्रीय कमिटीको संख्या बढेको नेताहरु बताउँछन्।
_20241020152337.png)
