भक्तपुर । दसैँ नजिकिएसँगै भक्तपुरको सल्लाघारीमा मुस्ताङबाट ल्याइएका च्याङ्ग्राको बिक्री सुरु भएको छ । दसैँमा च्याङ्ग्राको मासु खाने परम्परालाई लक्षित गर्दै व्यापारीहरूले सल्लाघारीमा च्याङ्ग्रा ल्याएर बिक्री सुरु गरेका हुन् ।
यस वर्ष च्याङ्ग्रा खरिद तथा ढुवानीमा कठिनाइ हुनुका साथै मूल्यसमेत बढेको व्यापारीहरूले बताएका छन् । सिन्धुपाल्चोक घर भई हाल भक्तपुरको दुवाकोटमा बस्दै आएका च्याङ्ग्रा व्यापारी मेखबहादुर नेपालले ३० वर्षभन्दा लामो समयदेखि च्याङ्ग्राको व्यापार गर्दै आएकोमा यस वर्षजस्तो महँगी यसअघि अनुभव नगरेको बताए ।
उनका अनुसार गत वर्षको तुलनामा यस वर्ष च्याङ्ग्राको मूल्य प्रतिगोटा करिब तीन हजार रुपैयाँसम्म महँगिएको छ । यद्यपि उपभोक्तालाई ध्यानमा राख्दै आफूले गत वर्षकै हाराहारीमा मूल्य राखेर बिक्री गरिरहेको उनले बताए ।
सल्लाघारीमा च्याङ्ग्राको मूल्य प्रतिकेजी जिउँदो तौलमा एक हजार २५० देखि एक हजार ३०० रुपैयाँसम्म रहेको छ । व्यापारी नेपालले आफूले प्रतिकेजी एक हजार ३०० रुपैयाँभन्दा बढीमा बिक्री नगरेको बताए । पसलमा लैजाने व्यापारीहरूलाई भने खरिदको परिमाण र कारोबारलाई ध्यानमा राखेर प्रतिगोटा १० देखि २० रुपैयाँसम्म छुट दिने गरिएको उनले जानकारी दिए ।
यस वर्ष मुस्ताङबाट काठमाडौंसम्म च्याङ्ग्रा ल्याउनसमेत निकै कठिन भएको व्यापारीहरूको भनाइ छ । वर्षाका कारण सडक र पुलमा क्षति पुगेपछि ढुवानी प्रभावित भएको थियो । कतिपय स्थानमा खानपिन तथा बासको उचित व्यवस्था नहुँदा व्यापारी र च्याङ्ग्रा दुवैले समस्या भोग्नुपरेको थियो ।
क्षतिग्रस्त पुल तथा सडक पार गराउन डोजर र टिपरको सहयोग लिनुपरेको नेपालले बताए । च्याङ्ग्रा तार्न व्यापारीहरू आपसमा मिलेर काम गर्नुपरेको उनको भनाइ छ । ढुवानीका क्रममा विभिन्न कठिनाइ झेल्दै च्याङ्ग्रा काठमाडौं ल्याइएको उनले बताए ।
नेपालले यस वर्ष करिब पाँच सय च्याङ्ग्रा ल्याएका छन् । तीमध्ये दुई सय च्याङ्ग्रा कलंकी खसीबजारका व्यापारीलाई बिक्रीका लागि उपलब्ध गराएका छन् भने बाँकी ३५१ वटा च्याङ्ग्रा सल्लाघारीमा ल्याएका छन् । सल्लाघारीमा मंगलबारदेखि च्याङ्ग्राको बिक्री सुरु गरिएको हो ।
दसैँका लागि च्याङ्ग्रा खरिद गर्न उपत्यकाका विभिन्न स्थानबाट उपभोक्ता सल्लाघारी पुग्ने अपेक्षा व्यापारीहरूले गरेका छन् । मूल्यवृद्धि र ढुवानीमा कठिनाइ भए पनि दसैँको मागलाई लक्षित गर्दै व्यापारीहरूले च्याङ्ग्रा बिक्रीका लागि ल्याएका हुन् ।
