काठमाडौं । नागरिकता विधेयकका विवादित विषयमा छलफल गर्न नेपाल कम्युनिस्ट पार्टी (नेकपा) को सचिवालय बैठक बोलाइएको छ । शनिबार बिहान ९ बजेका लागि बैठक बोलाइएको हो ।
संसद्को राज्य व्यवस्था तथा सुशासन समितिमा विधेयक दफावार छलफलका क्रममा छ । डेढ वर्षदेखि विधेयक समितिमा नै छ । विवादका कारण विधेयक समितिले पारित गर्न सकेको छैन । राजनीतिक सहमतिको प्रयासका लागि विधेयकको छलफल हाल रोकिएको छ ।
बुधबार प्रधानमन्त्री केपी शर्मा ओलीले प्रमुख प्रतिपक्ष दलका नेताहरुसँग पनि विवादबारे छलफल गरेका छन् ।
मुख्यगरी विधेयकमा वैवाहिक अंगीकृत नागरिकताको विषय विवादित छ । नेपाली पुरुषसँग विवाह गरेर आउने विदेशी महिलालाई तत्काल नागरिकता दिने वा केही समयपछि दिने भन्नेमा विवाद छ । समितिले अहिले कम्तीमा सात वर्षपछि मात्र नागरिकता दिनेगरी प्रस्ताव गरेको छ ।
तर, प्रतिपक्ष कांग्रेस र मधेशवादी दल उक्त प्रस्तावको विपक्षमा छन् । सत्तारुढ दल भने सात वर्षको समयसीमा राखेर जानुपर्ने पक्षमा छ ।
