काठमाडौँ। भोटेकोशी नदीमा आएको विनाशकारी बाढीका कारण ज्यान गुमाउनेको सङ्ख्या १ हजार २०४ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले बुधबार साँझ ६ बजेसम्मको अद्यावधिक विवरण सार्वजनिक गर्दै विभिन्न मानव अङ्गसहित १ हजार २०४ वटा शव फेला परेको पुष्टि गरेको हो।
प्राधिकरणका अनुसार बाढी प्रभावित तथा तल्लो तटीय क्षेत्रहरूमध्ये चितवनमा सबैभन्दा बढी ३४८ वटा शव फेला परेका छन्। त्यसैगरी नवलपरासी पूर्वमा २१७, नवलपरासी पश्चिममा २०२, नुवाकोटमा १५५, रसुवामा (टिमुरेबाट ल्याइएकासहित) ११५, गोरखामा ६९, धादिङमा ६० र तनहुँमा ३८ वटा शव भेटिएका छन्।
भेटिएका शवहरूमध्ये हालसम्म ९५ वटा शव मात्र आफन्तले पहिचान गरी बुझेका छन्। प्रहरीका अनुसार लामो समयसम्म पहिचान हुन नसकेका ५ सयभन्दा बढी शवहरूलाई कानुनी प्रक्रिया पूरा गरी जमिनमुनि गाडिसकिएको छ। हाल बाँकी रहेका शवहरूलाई पनि केही दिन पहिचानका लागि राखिने र त्यसपछि पनि पहिचान नभएमा डिएनए (DNA) नमुना सङ्कलनको प्रक्रिया पूरा गरेर व्यवस्थापन गरिने जनाइएको छ।
यसैबिच, बाढीमा परी बेपत्ता हुनेहरूको सङ्ख्या ४ हजार २१६ पुगेको प्राधिकरणले जनाएको छ। प्रभावित क्षेत्रहरूमा नेपाली सेना, नेपाल प्रहरी र सशस्त्र प्रहरी बलका साथै अन्तर्राष्ट्रिय विशेषज्ञ टोलीहरूले खोज तथा उद्धार कार्यलाई निरन्तरता दिइरहेका छन्।
