काठमाडौं। राष्ट्रिय आविष्कार केन्द्रका संस्थापक एवं म्याग्दी क्षेत्र नम्बर १ बाट निर्वाचित स्वतन्त्र सांसद महावीर पुन प्रधानमन्त्री बालेन्द्र शाह नेतृत्वको सरकारमा मन्त्री बन्ने हुनुभएको छ। सरकारले मन्त्रालयहरूको सङ्ख्या २५ बाट घटाएर १८ मा झार्दै विज्ञान, प्रविधि तथा नवप्रवर्तनलाई प्रवर्द्धन गर्न छुट्टै मन्त्रालय गठन गरेपछि सो मन्त्रालयको जिम्मेवारी पुनलाई सुम्पन लागिएको हो।
नवनियुक्त मन्त्री पुनको पद तथा गोपनीयताको शपथ ग्रहण आजै दिउँसो ३ बजे राष्ट्रपति भवन शीतल निवासमा आयोजना गर्ने गरी प्रधानमन्त्रीको कार्यालयले आवश्यक तयारी अगाडि बढाएको छ।
यसअघि २०८२ सालको जनआन्दोलन (जेन–जी प्रोटेस्ट) पछि गठित सुशीला कार्की नेतृत्वको अन्तरिम सरकारमा पुनले शिक्षा, विज्ञान तथा प्रविधि मन्त्रीको रूपमा छोटो समय जिम्मेवारी सम्हाल्नुभएको थियो। नयाँ संसदीय निर्वाचनमा भाग लिनका लागि उहाँले मन्त्री पदबाट राजीनामा दिनुभएको थियो। त्यसलगत्तै सम्पन्न आमनिर्वाचनमा म्याग्दी–१ बाट स्वतन्त्र उम्मेदवारी दिनुभएका पुन भारी मतका साथ विजयी भई प्रतिनिधिसभा सदस्यमा निर्वाचित हुनुभएको हो।
नेपालमा विज्ञान, अनुसन्धान र नवप्रवर्तन (इन्नोभेसन) का लागि छुट्टै र बढी केन्द्रित मन्त्रालय आवश्यक रहेको भनी महावीर पुनले लामो समयदेखि सरकारलाई सुझाव दिँदै आउनुभएको थियो। उहाँकै सोही सुझाव र परिकल्पनाका आधारमा सरकारले यसपटक 'विज्ञान, प्रविधि तथा नवप्रवर्तन मन्त्रालय' को स्थापना गरेको हो। आफ्नै प्रत्यक्ष चासो र विज्ञता रहेको क्षेत्र भएकाले पुनको नेतृत्वमा यस मन्त्रालयले देशको प्रविधिको विकास र नयाँ प्रतिभाहरूलाई प्रोत्साहन गर्न ठोस योगदान दिने विश्वास गरिएको छ।
