सर्लाही । सर्लाहीको पर्सा गाउँपालिका – ४ स्थित जिगडवा आधारभूत विद्यालयमा रहेको मतदान केन्द्रमा खटिएका एक मतदान अधिकृतको अचानक बेहोस भएर मृत्यु भएको छ ।
जिल्ला प्रहरी कार्यालय सर्लाहीका अनुसार रौतहटको माधव नारायण नगरपालिका –६ निवासी ४२ वर्षीय रघुनाथ महतो उक्त मतदान केन्द्रमा मतदान अधिकृतका रूपमा खटिएका थिए । उनी सर्लाहीको बरहथवा नगरपालिका – ५ स्थित आधारभूत स्वास्थ्य केन्द्र बरहथवामा सिनियर अहेवका रूपमा कार्यरत थिए ।
मंगलबार दिउँसो २ बजे ड्युटीमा रहेका बेला महतो अचानक बेहोस भएका थिए। बेहोस भएपछि तत्काल उपचारका लागि उनलाई जिल्ला सदरमुकाम मलंगवास्थित प्रादेशिक अस्पतालमा लगिएको थियो ।
अस्पतालमा करिब २ः३० बजे चिकित्सकले जाँच गर्दा उनलाई मृत घोषणा गरिएको प्रहरीले जनाएको छ । घटनास्थल जिल्ला प्रहरी कार्यालय सर्लाहीबाट करिब १० किलोमिटर पूर्वमा पर्दछ । घटनाबारे थप अनुसन्धान भइरहेको जिल्ला प्रहरी कार्यालय सर्लाहीले जनाएको छ ।
