काठमाडौं। नेपाल समाजवादी पार्टी (नयाँशक्ति) का अध्यक्ष डा.बाबुराम भट्टराईले नेपाली कांग्रेसलाई भ्रष्टाचारी पार्टीको रुपमा चित्रण गरेका छन् । आज (आइतबार) पार्टी प्रथम महाधिवेशनमा भट्टराईले पेश गरेको राजनीतिक तथा संगठनात्मक प्रस्तावमा उनले कांग्रेसका नेताहरु कुनै न कुनै भ्रष्टाचार र अनियमिततासँग जोडिने गरेको उल्लेख गरेका छन् । उनले कांग्रेसबाट अर्थ राजनीतिक समस्या र नयाँ युगको नयाँ कार्यभार पूरा नहुने बताएका छन्।
‘यस (कांग्रेस) का नेताहरू सधैँ कुनै न कुनै भ्रष्टाचार र अनियमिततासँग जोडिने गरेका छन् । देशका गम्भीर प्रकृतिका अर्थ राजनीतिक समस्या र नयाँ युगको नयाँ कार्यभार यो ऐतिहासिक रुपले पुरानो भइसकेको राजनीतिक धार र शक्तिबाट पूरा हुन असम्भव छ,’– उनले भनेका छन् ।
साथै, बिपी कोइरालाको समय यता कांग्रेसले वैचारिक, राजनीतिक कार्यक्रमिक ढंगले खासै प्रगति र नयाँपन प्रदर्शन गर्न नसकेको उनको दाबी छ । पटक–पटक सत्ताको नेतृत्व गर्दा पनि देशका राजनीतिक, आर्थिक, प्रशासनिक, सामाजिक, साँस्कृतिक क्षेत्रमा कांग्रेसले गुणात्मक रूपान्तरण गर्न नसकेको उनको दाबी छ ।
