काठमाडौं। संयुक्त अरब इमिरेट्स (युएई)मा आजदेखि सुरु भएको पुरुष यु-१९ एसिया कप-२०२४ को पहिलो खेलमा नेपाल श्रीलंकासँग पराजित भएको छ।
नेपाल श्रीलंकासँग ५५ रनले पराजित भएको हो। युएईको शारजहास्थित शारजहा क्रिकेट रंगशालामा टस जितेर व्याटिङको निम्तो पाएको श्रीलंकाले नेपाललाई दुई सय ३४ रनको लक्ष्य दिएको थियो।
सो लक्ष्य पछ्याउने क्रममा नेपालले सबै विकेट गुमाएर जम्मा १७८ रन मात्र बनायो। श्रीलंकाका लागि शरुजन षणमुगनाथनले सर्वाधिक ६२ रन बनाए।
उनले ९९ बलमा दुई चौकाको मद्दतले ६२ रन बनाएका हुन्। लकविन अवेसिंघेले ५० रनको योगदान दिए।
उनले ५३ बलमा एक छक्का र दुई चौकासमेत प्रहार गरे। दुल्निथ सिगेरा र विमथ दिनसाराले समान २४/२४ रन बनाए। श्रीलंकाका लागि कविजा गमागेले नटआउट ३७ रनको योगदान दिए।
त्यस्तै, कप्तान विहास थेवमिकाले तीन, कुगदास मथुलन, पुलिन्दु परेरा र प्रवीण मनिषाले समान दुई/दुई रन बनाए। विरन चामुदिथाले एक रन पनि जोड्न सकेनन्। नेपालका लागि सन्तोष यादवले सर्वाधिक ४ विकेट लिए । यस्तै, युवराज खत्रीले दुई, हेमन्त धामी र नरेन साउदले समान एक/एक विकेट हात पारे।
