बलिउड अभिनेता शाहरुख खानका छोरा आर्यन खान लागूपदार्थ सेवनको मुद्दा परी जेलमा छन् । उनले सेवन गरेको लागूपदार्थको कनेक्सन बिहारको मोतिहारीसँग जोडिएको पाइएपछि नार्कोटिक्स कन्ट्रोल ब्यूरोको एक टोली मोतिहारी पुगेको छ । नेपालको सीमा पार गरी तस्करहरूले बिहारमा लागूपदार्थ लैजाने र त्यहाँबाट मुम्बई पुर्याउने गरेको बुझिएको छ ।
एनसीबीको टोलीले विभिन्न व्यक्तिहरूसँग सोधपुछ गरिरहेको छ र सात दिनका लागि उनीहरूलाई मुम्बई पनि लग्नेछ । आर्यन खानसँगै जेलमा रहेका तस्कर विजय वंशी प्रसादका एक नातेदार मोतिहारी जेलमा थुनिएका छन् । त्यसबाट मोतिहारी कनेक्सन पत्ता लागेको हो ।
नेपालको बाटो हुँदै मोतिहारीसम्म कारमा लागूपदार्थ तस्करी हुने र सडकमार्गबाटै मुम्बई पुर्याइने गरेको जानकारी छ । सन् २०२० को सेप्टेम्बर १९ मा मुजफ्फरपुर नगर थानाको प्रहरीले सरैयागंज र बालूघाटबाट ६ जना अनि मोतिहारीको चकिया प्रहरीले चकियाबाट उस्मान र विजय वंशीलाई ठूलो परिणामको गाँजाका साथ पक्राउ गरेको थियो ।
