काठमाडौं। चितवनको इच्छाकामना गाउँपालिका–४ स्थित घोप्टेभिरमा सडकमाथिबाट सुक्खा पहिरो खस्दा पृथ्वी राजमार्ग पूर्ण रूपमा अवरुद्ध बनेको छ ।
चितवन प्रहरीका अनुसार आज बिहान ५ बजे खसेको पहिरोका कारण राजमार्गमा दुवैतर्फको यातायात सेवा ठप्प भएको हो । पहिरो हटाएर सडक सञ्चालनमा ल्याउनका लागि आवश्यक उपकरणसहित काम भइरहेको प्रहरीले जनाएको छ ।
यसअघि आइतबार पनि सोही स्थानमा सुक्खा पहिरो खसेर राजमार्ग केही समय अवरुद्ध बनेको थियो । लगातार पहिरो खस्ने क्रम नरोकिएकाले सो क्षेत्रमा यात्रा गर्दा सजगता अपनाउन प्रहरीले आग्रह गरेको छ ।
