काठमाडाैं। जल तथा मौसम विज्ञान विभागबाट जारी अति भारी वर्षाको चेतावनी र प्रधानमन्त्री तथा मन्त्रिपरिषद्को कार्यालयको निर्देशनपछि स्वास्थ्य तथा खाद्य स्वच्छता मन्त्रालयले देशभरका स्वास्थ्य निकायहरूलाई उच्च सतर्कता अपनाउन निर्देशन दिएको छ।
असोज ८ देखि ११ गतेसम्म हुन सक्ने सम्भावित बाढी, पहिरो र डुबानका कारण सिर्जना हुनसक्ने स्वास्थ्य आपतकाललाई सम्बोधन गर्न मन्त्रालयले सङ्घीय अस्पताल, स्वास्थ्य सेवा विभाग, प्रतिष्ठान तथा प्रदेशका स्वास्थ्य मन्त्रालयहरूलाई पूर्वतयारीमा जुट्न भनेको हो।
मन्त्रालयले सार्वजनिक बिदाका दिनमा समेत स्वास्थ्यकर्मीहरूलाई आवश्यकता अनुसार तत्काल परिचालन हुन सक्ने गरी सम्पर्कमा रहन निर्देशन दिएको छ। प्रदेश स्वास्थ्य आपतकालीन कार्यसञ्चालन केन्द्रहरूलाई २४ सै घण्टा खुला राखी निरन्तर सूचना सङ्कलन, समन्वय र अनुगमन गर्न भनिएको छ।
साथै, स्वास्थ्य सेवा विभागलाई आकस्मिक तथा नियमित स्वास्थ्य सेवा प्रवाहका लागि आवश्यक जनशक्ति, औषधि र स्वास्थ्य सामग्रीको प्रबन्ध मिलाई असोज ८ गतेभित्रै मन्त्रालयमा कार्ययोजना पेश गर्न निर्देशन दिइएको छ।
विपद्को उच्च जोखिममा रहेका जिल्लाहरूमा सर्पदंशको सुई, जीवनजल लगायतका अत्यावश्यक औषधिहरू पर्याप्त मात्रामा मौज्दात राख्न र द्रुत प्रतिकार्य टोली (RRT) लाई तम्तयार राख्न मन्त्रालयले निर्देशन दिएको छ।
यसैगरी, सुत्केरी हुने मिति नजिकिएका गर्भवती महिला र दीर्घरोगीहरूलाई विपद्का बेला सेवा अवरुद्ध हुनसक्ने भएकाले पूर्वसावधानी स्वरूप सुरक्षित स्थान वा नजिकैको स्वास्थ्य संस्था नजिक रहन र आफ्ना नियमित औषधिहरू पर्याप्त साथमा राख्न आग्रह गरिएको छ। आपतकालीन अवस्थामा एम्बुलेन्स सेवाका लागि १०२ मा सम्पर्क गरी स्वास्थ्य सेवा लिन पनि मन्त्रालयले सहजीकरण गरेको छ।
