नयाँदिल्ली। भारतका रक्षामन्त्री राजनाथ सिंहले सोमबार नयाँदिल्लीस्थित नेपाली दूतावास पुगेर नेपालमा आएको विनाशकारी बाढीपहिरोप्रति ऐक्यबद्धता जनाएका छन्। उनले विपद्को यस कठिन घडीमा भारतको निरन्तर सहयोग रहने प्रतिबद्धता व्यक्त गर्दै शोक पुस्तिकामा सन्देशसमेत लेखेका छन्।
नेपाल र भारत निकट मित्र तथा साझेदार रहेको उल्लेख गर्दै रक्षामन्त्री सिंहले लेखेका छन्, "सुख–दुःखको साथीका रूपमा भारत सधैँ नेपालसँग उभिएको छ। यस कठिन समयमा पनि हामी नेपाली दाजुभाइ तथा दिदीबहिनीहरूसँग काँधमा काँध मिलाएर उभिएका छौँ। खोजी, उद्धार तथा पुनःस्थापनाका लागि नेपालले गरिरहेका प्रयासमा सहयोग गर्न भारत पूर्ण प्रतिबद्ध छ।"
गत अगस्ट २६ (भदौ १०) मा तिब्बतसँग सीमा जोडिएको रसुवा जिल्लामा हिमनदी फुटेर भोटेकोशी नदीमा आएको विनाशकारी बाढीका कारण हालसम्म ९०३ जनाको मृत्यु भइसकेको छ भने ४ हजार २४७ जना बेपत्ता छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) का अनुसार हालसम्म १० हजार ४५१ जनाको जीवितै उद्धार गरिएको छ। बाढीपछि नेपाल र चीन दुवैतर्फ छैटौँ दिन पनि खोजी तथा उद्धार कार्य जारी छ।
विपद्को खबरलगत्तै भारतले नेपाललाई निरन्तर मानवीय सहायता उपलब्ध गराउँदै आएको छ। भारतबाट आइतबार ११ टन राहत सामग्री बोकेको चौथो विमान नेपाल आइपुगेको थियो। उक्त राहत सामग्रीमा त्रिपाल, स्लीपिङ ब्याग, कम्बल र सरसफाइ किटका साथै खोजी तथा उद्धारका लागि टनेल प्राविधिक टोली र डीएनए परीक्षणका लागि फरेन्सिक विज्ञहरूको टोलीसमेत समावेश छ।
