काठमाडौं। सरकारले राष्ट्रसेवक कर्मचारीहरूको नयाँ तलबमान स्वीकृत गरेको छ। प्रधानमन्त्री तथा मन्त्रिपरिषद्को कार्यालयले अर्थ मन्त्रालयबाट प्राप्त नयाँ तलबमानको प्रस्तावलाई स्वीकृत गरेको हो।
अर्थ मन्त्रालयले गत साउन ६ गते नयाँ तलबमान स्वीकृतिका लागि मन्त्रिपरिषद्मा पठाएको थियो। सो प्रस्तावलाई १५ दिनपछि क्याबिनेटले पारित गर्दै स्वीकृति दिएको हो।
स्वीकृत नयाँ तलबमान अनुसार अब निजामती सेवाका सर्वोच्च पद मुख्यसचिवले मासिक ९० हजार ५ सय ९४ रुपैयाँ तलब पाउनेछन्। त्यसैगरी, सबैभन्दा तल्लो तहका प्रथम स्तरका कार्यालय सहयोगीले मासिक २८ हजार ९ सय ८४ रुपैयाँ प्राप्त गर्नेछन्।
यसअघि अर्थमन्त्री स्वर्णिम वाग्लेले बजेट वक्तव्यमार्फत नयाँ आर्थिक वर्षको साउन महिनादेखि लागू हुने गरी राष्ट्रसेवक कर्मचारीको तलबमा १० प्रतिशत र प्रोत्साहन भत्ता बापत थप १० प्रतिशत वृद्धि गर्ने घोषणा गर्नुभएको थियो। सोही घोषणा बमोजिम नयाँ तलबमान कार्यान्वयनमा ल्याइएको हो।
