सुर्खेत। कर्णाली प्रदेशका मुख्यमन्त्री यामलाल कँडेलले आफ्नो पदबाट राजीनामा दिएका छन्। शनिबार अपरान्ह बसेको प्रदेशसभाको बैठकलाई सम्बोधन गर्दै उनले पद त्यागको घोषणा गरेका हुन्।
सत्ता साझेदार नेपाली कांग्रेसले समर्थन फिर्ता लिँदै असार ३१ गते सरकारबाट आफ्ना मन्त्रीहरू फिर्ता बोलाएपछि कँडेल नेतृत्वको सरकार संकटमा परेको थियो। त्यसपछि असार ३२ गते नेपाली कांग्रेस र नेकपा (माओवादी केन्द्र) सहितका १६ जना सांसदहरूले मुख्यमन्त्री कँडेलविरुद्ध प्रदेशसभा सचिवालयमा अविश्वासको प्रस्ताव दर्ता गराएका थिए।
शनिबार दिउँसो ३ बजे सोही अविश्वासको प्रस्तावमाथि छलफल गर्ने कार्यसूचीसहित प्रदेशसभा बैठक आह्वान गरिएको थियो। तर, मतदान प्रक्रिया र अविश्वासको प्रस्ताव सामना गर्नुअघि नै मुख्यमन्त्री कँडेलले संसदमा आफ्नो धारणा राख्दै कुर्सीभन्दा राजनीतिक सिद्धान्त र नैतिकता ठूलो भएको उल्लेख गरे र राजीनामाको घोषणा गरे।
_20240208203200.jpg)
