काठमाडौं। संघीय संसद अन्तर्गत राष्ट्रियसभाको बैठक आज बस्दैछ। सिंहदरबारमा दिउँसो सवा १ बजे सुरु हुने यस बैठकका लागि विभिन्न महत्त्वपूर्ण कार्यसूचीहरू तय गरिएका छन्।
आजको बैठकमा विशेष गरी परराष्ट्रमन्त्री शिशिर खनाल र संस्कृति, पर्यटन तथा नागरिक उड्डयनमन्त्री खडकराज पौडेलले आ-आफ्नो मन्त्रालयसँग सम्बन्धित मौखिक प्रश्नहरूको जवाफ दिने कार्यक्रम रहेको छ।
यसका साथै बैठकमा सांसद रेनु चन्दले प्रविधिको प्रयोग गरी हुने लैङ्गिक हिंसा रोकथाम, नियन्त्रण एवं महिलाको हकको संरक्षण र न्यायमा पहुँच सुनिश्चित गर्न आवश्यक नीतिगत, कानूनी तथा संस्थागत व्यवस्था गरी प्रभावकारी कार्यान्वयन गर्ने सम्बन्धी संकल्प प्रस्ताव प्रस्तुत गर्नेछन्।
बैठकको अन्त्यतिर राष्ट्रियसभाका अध्यक्षले प्रधानमन्त्री तथा मन्त्रिपरिषद्को कार्यालयबाट प्राप्त पत्रको बेहोरा पढेर सदनलाई जानकारी गराउने कार्यसूची समेत रहेको छ।
