काठमाडौं। डेब्यु फिल्म ‘लालीबजार’बाट दर्शकमाझ बलियो पहिचान बनाउन सफल भएका अभिनेता विशाल देवकोटाले मंगलबार आफ्नो जन्मोत्सव मनाएका छन्। नेपालको रंगमञ्चमा अभिनेतासँगै निर्देशकको रूपमा परिचित देवकोटाका लागि यसपटकको जन्मदिन विशेष बनेको छ ।
सोमबार मात्रै आफ्नो डेब्यु फिल्म प्रदर्शनको ५१औँ दिन मनाएका विशालले मंगलबार जन्मदिन पर्दा आफूलाई दोहोरो खुसी मिलेको र यहाँबाट नयाँ यात्रा प्रारम्भ भएको महसुस गरेको बताएका छन् ।
फिल्ममा उनले निर्वाह गरेको नारायणको भूमिकालाई दर्शकले निकै मन पराएका छन्, जसमा उनी कुप्रथा विरुद्ध आवाज उठाउने, शिक्षाको महत्त्व बुझाउने र इमानदार पात्रको रूपमा प्रस्तुत भएका थिए ।
सानैदेखि कलाकार बन्ने सपना बोकेका विशाल झन्डै ९ वर्ष अगाडि चितवनबाट काठमाडौँ आएका थिए । उनले कान्तिपुर थिएटरमा मञ्चन भएको ‘मीरा’ नाटकमा अभिनय गर्दा फिल्म ‘लालीबजार’को टिमको ध्यान उनीतिर खिचिएको थियो ।
उक्त नाटक हेर्न पुगेका निर्देशक प्रदीप भट्टराई, रबिन र जेभीले उनलाई अफिसमा बोलाएर अडिसनको प्रक्रिया सुरु गराएका थिए । निर्माण कम्पनी षट्कोण आर्ट्सका अनुसार उनको अभिनय कौशलताकै कारण अडिसनका विभिन्न चरण पार गर्दै उनी डेब्यु फिल्ममै अभिनेत्री स्वस्तिमा खड्काको जोडी बन्ने अवसर पाउन सफल भएका हुन् । रंगमञ्चको लामो सङ्घर्ष र अनुभवले नै फिल्मको ढोका खोलेको भन्दै उनले अहिले आफ्नो मेहनतको फल पाइरहेको अनुभूति गरेको बताएका छन् ।
उमेरका हिसाबले आफू परिपक्क भइसकेको बताउने विशाल पहिलो फिल्मबाटै दर्शकको अपार माया पाएर उत्साहित छन् । दर्शक भेटघाटका लागि मोफसल टुरमा निस्कँदा अधिकांश दर्शकले ‘छोरा होस् त नारायण जस्तो’ भन्दै प्रतिक्रिया दिएको उनले स्मरण गरे ।
‘लालीबजार’को सफलतासँगै फिल्म मेकरहरूको नजरमा परेका उनलाई नयाँ फिल्महरूबाट अभिनयको प्रस्ताव समेत आउन थालेको छ । केही मेकरहरूसँग कुराकानी भइरहेको भए पनि हालसम्म पहिलो फिल्मकै काममा व्यस्त रहेकाले आगामी प्रोजेक्टबारे औपचारिक निर्णय गरिनसकेको र अब छिट्टै नयाँ फिल्मको तयारीमा जुट्ने उनले जानकारी दिएका छन् ।
