काठमाडौँ । सामाजिक सञ्जालमा आफ्ना निजी कुराकानीका स्क्रिनसट र भिडियोहरू बाहिरिएपछि चर्चित गायक सुजन चापागाईं विवादमा तानिएका छन्। केही दिनयता टिकटक, इन्स्टाग्राम र रेडिट जस्ता डिजिटल प्लेटफर्महरूमा उनीसँग जोडिएका विभिन्न च्याटहरू तीव्र रूपमा भाइरल भइरहेका छन्।
सार्वजनिक भएका कतिपय संवादहरूमा दोहोरो अर्थ लाग्ने र अनुपयुक्त शब्दहरूको प्रयोग भएको पाइएको छ। यसैबीच, केही किशोरीहरूले गायक चापागाईंले इन्स्टाग्रामको ‘भ्यानिस मोड’ (सन्देश स्वतः हराउने फिचर) प्रयोग गरी आफूहरूसँग अशोभनीय र संवेदनशील कुराकानी गर्ने गरेको आरोप समेत लगाएका छन्।
चौतर्फी आलोचना र विवाद बढेपछि गायक चापागाईंले फेसबुकमार्फत आफ्नो आधिकारिक धारणा सार्वजनिक गरेका छन्। उनले बाहिरिएका केही सन्देशहरू आफ्नै भएको स्वीकार गर्दै विगतमा निकट रहेका व्यक्तिहरूसँग भएका संवादका कारण सिर्जित परिस्थितिलाई लिएर दुःख व्यक्त गरेका छन् र शुभचिन्तकहरूसँग क्षमायाचना गरेका छन्।
यद्यपि, सामाजिक सञ्जालमा भाइरल बनाइएका सबै सामग्रीहरू सत्य नरहेको उनको दाबी छ। आफ्नो आधिकारिक सामाजिक सञ्जाल खाताहरू (Social Media Accounts) विभिन्न समयमा व्यवस्थापक (Managers) हरूले पनि चलाउने गरेको उल्लेख गर्दै उनले कतैबाट यसको दुरुपयोग भएको हुन सक्ने आशंका व्यक्त गरेका छन्।
आफ्नो चरित्र हत्या गर्ने उद्देश्यले 'फेक' (नक्कली) र तोडमरोड गरिएका सामग्रीहरू फैलाइएको भन्दै चापागाईंले त्यस्ता तत्वहरू विरुद्ध कानुनी कदम चाल्ने चेतावनी समेत दिएका छन्।
