काठमाडौँ । राष्ट्रिय स्वतन्त्र पार्टी (रास्वपा) को पहिलो ऐतिहासिक राष्ट्रिय महाधिवेशन भव्य रूपमा सम्पन्न भएको छ। गत आइतबारदेखि काठमाडौँमा सुरु भएको यस महाधिवेशनले पार्टीलाई नयाँ वैचारिक दिशा र आगामी कार्यकालका लागि नयाँ नेतृत्व सुम्पिएको छ।
आज पदाधिकारीहरूको निर्वाचन तथा चयन प्रक्रिया टुङ्गिएसँगै रास्वपाले सांगठनिक रूपमा पूर्णता पाएको हो। पार्टीको सर्वोच्च पद सभापतिमा रवि लामिछाने निर्विरोध निर्वाचित भएका छन्।
पार्टी स्थापना कालदेखि नै नेतृत्व सम्हाल्दै आएका लामिछानेलाई महाधिवेशन प्रतिनिधिहरूले सर्वसम्मत रूपमा पुनः सभापतिको जिम्मेवारी सुम्पेका हुन्। त्यसैगरी, प्रखर अर्थशास्त्री तथा नेता डा. स्वर्णिम वाग्ले पनि उपसभापति पदमा निर्विरोध निर्वाचित भएका छन्।
महाधिवेशनको दोस्रो चरण अन्तर्गत शुक्रबार भएको पदाधिकारीहरूको निर्वाचनले पार्टीभित्रको आन्तरिक लोकतन्त्रलाई थप सबल बनाएको छ। अत्यधिक चासोका साथ हेरिएको महिला उपसभापति पदमा सोविता गौतम निर्वाचित भएकी छिन्, जसले आफ्नी प्रतिस्पर्धी डा. तोसिमा कार्कीलाई पराजित गर्दै उक्त ओहोदा सुरक्षित गरेकी हुन्। पार्टीको सांगठनिक कमान्ड सम्हाल्ने महत्वपूर्ण महामन्त्री पदमा विपिन आचार्य निर्वाचित भएका छन्।
यस पदका लागि विपिनसँगै मनिष झा, सागर ढकाल र गणेश कार्की चुनावी मैदानमा उत्रिएका थिए। त्यस्तै, दुई खुला सहमहामन्त्री पदका लागि भएको तीव्र प्रतिस्पर्धामा हरि ढकाल र असिम शाह विजयी हुन सफल भएका छन् भने महिलातर्फको सहमहामन्त्री पदमा युवा नेत्री निशा डाँगी निर्वाचित भएकी छिन्।
यसअघि भएको पहिलो चरणको मतदान प्रक्रियाबाट ९९ जना केन्द्रीय सदस्यहरू निर्वाचित भइसकेका छन्। समावेशी र युवा बहुल मानिएको यस केन्द्रीय समितिले रास्वपालाई आगामी निर्वाचन र नीतिगत बहसमा अझ बलियो ढंगले अगाडि बढाउने विश्वास गरि
एको छ। नयाँ नेतृत्व र पदाधिकारीहरूको अन्तिम परिणाम घोषणा भएसँगै महाधिवेशन स्थलमा उत्सवको माहौल छाएको छ। लामो समयको सांगठनिक कसरत र लोकतान्त्रिक अभ्यास पार गरेर निर्वाचित भएका रास्वपाका नेता तथा कार्यकर्ताहरू अङ्गालोमा बेरिएर, अबिर जात्रा गर्दै र एकापसमा बधाई साटासाट गरेर खुसी मनाइरहेका छन्। पहिलो महाधिवेशनबाट चुनिएको यो टोलीले देशमा वैकल्पिक राजनीतिको जगलाई अझ मजबुत बनाउने संकल्प लिएको छ।
