काठमाडाैं। नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले पार्टीलाई नयाँ दिशामा अघि बढाउन डिजिटल प्रविधिको अधिकतम उपयोग गर्दै ‘आइटी फौज’ निर्माण गर्ने घोषणा गरेका छन् ।
शुक्रबार काठमाडौंमा आयोजित नेकपाको डिजिटल सदस्यता नवीकरण तथा वितरण अभियानको शुभारम्भ कार्यक्रममा बोल्दै उनले पार्टी संगठन विस्तारका लागि डिजिटल प्रविधिको प्रयोग अपरिहार्य भइसकेको बताए ।
उनले आफ्नो पार्टी अहिले नयाँ सिराबाट अगाडि बढ्न खोजिरहेको र सदन, सडक तथा सरकारका सबै मोर्चाबाट संघर्ष गर्ने मुडमा रहेको उल्लेख गर्दै नयाँ आवश्यकतासँग लड्न सक्ने बनाउन एउटा विशाल आईटी आर्मी नै चाहिएको स्पष्ट पारे । लाखौं जनतालाई गोलबद्ध गरेर त्यस्तो फौज तयार पार्ने काम कम्युनिष्ट र देशलाई माया गर्ने पक्षधरहरूले मात्र गर्न सक्ने उनको दाबी थियो ।
कार्यक्रमका क्रममा उनले डिजिटल क्षेत्रमा पर्याप्त लगानी हुन नसकेको भन्दै चुनावी खर्चसँग तुलना गरेर असन्तुष्टि समेत व्यक्त गरे । चुनावका बेला एउटै निर्वाचन क्षेत्रमा करोडौं रुपैयाँ खर्च हुने गरे पनि आईटी क्षेत्रमा एक-दुई करोड खर्च गर्न समेत गाह्रो मानिएको भन्दै उनले गुनासो गरे ।
यदि चुनावमा हुने खर्चको आधा रकम मात्रै पनि आईटी क्षेत्रमा लगाएको भए परिणाम फरक आउन सक्ने उनको भनाइ थियो । उनले डिजिटल माध्यमबाट जनसंगठन विस्तार गर्दै पार्टीलाई जनताको पक्षमा अझ मजबुत बनाउने योजना रहेको सुनाए ।
यसैगरी, संयोजक प्रचण्डले वर्तमान सरकारको नीति तथा कार्यक्रमप्रति कडा आलोचना गर्दै वर्तमान सरकार गरिब, मजदुर र किसानको हितभन्दा बढी उच्च वर्गको हित रक्षा गर्नमा केन्द्रित भएको आरोप लगाए ।
सरकारका नीति, बजेट र अन्य निर्णयहरूले सरकार नेपालका गरिब दुःखीका विरुद्ध रहेको प्रष्ट पारेको उनको जिकिर थियो । उनले प्रतिक्रियावादीहरूलाई फाइदा पुग्ने गरी समाजमा निराशाको खेती नगर्न आग्रह गर्दै नयाँ सोच र जोसका साथ अघि बढ्न पार्टीका सम्पूर्ण सदस्यहरूलाई निर्देशनसमेत दिए ।
