काठमाडाैं। नेपालमा हाल उपल्लो वायुमण्डलमा रहेको पश्चिमी न्यूनचापीय रेखा, स्थानीय वायु तथा पूर्वीय वायुको आंशिक प्रभाव रहेको छ । जल तथा मौसम विज्ञान विभाग, मौसम पूर्वानुमान महाशाखाका अनुसार देशका विभिन्न भू-भागमा बदली, वर्षा, हिमपात र केही स्थानमा अत्यधिक गर्मीको मिश्रित प्रभाव देखिनेछ ।
आज दिउँसो कोशी, बागमती, गण्डकी, कर्णाली र सुदूरपश्चिम प्रदेशका पहाडी तथा हिमाली भू-भाग, लुम्बिनी प्रदेशको हिमाली क्षेत्र र कोशी प्रदेशको तराई क्षेत्रमा साधारणतया बदली रहनेछ । लुम्बिनीको पहाडी भू-भाग र मधेस प्रदेशको तराईमा आंशिक बदली रहने भए पनि अन्य तराई भू-भागमा मौसम मुख्यतया सफा रहने देखिन्छ ।
मौसममा आएको यो बदलावका कारण कोशी प्रदेशका पहाडी तथा हिमाली क्षेत्रका केही स्थानहरूमा तथा बागमती र गण्डकी प्रदेशका थोरै स्थानमा मेघगर्जन र चट्याङसहित मध्यम वर्षा र हिमपातको सम्भावना छ । यसैगरी लुम्बिनी, कर्णाली र सुदूरपश्चिम प्रदेशका हिमाली तथा पहाडी भेगका एक-दुई स्थानमा र कोशी प्रदेशको तराईका थोरै स्थानमा पनि मेघगर्जनसहित मध्यमसम्मको वर्षा हुन सक्ने महाशाखाले जनाएको छ ।
पहाडी क्षेत्रमा वर्षा र हिमपातको सम्भावना रहँदा तराई क्षेत्रमा भने गर्मीको प्रकोप यथावत रहनेछ । लुम्बिनी र सुदूरपश्चिम प्रदेशका तराई भू-भागका केही स्थानहरूमा तातो लहर (लु) चल्ने सम्भावना छ । साथै बागमती र गण्डकी प्रदेशका तराई भू-भागका केही स्थानमा पनि आज तातो दिन हुने भएकाले आवश्यक सतर्कता अपनाउन अनुरोध गरिएको छ ।
आज राति कोशी, बागमती र गण्डकी प्रदेशका हिमाली तथा पहाडी भू-भागमा साधारणतया बदली रहनेछ । अन्य हिमाली र पहाडी भेगका साथै कोशी प्रदेशको तराईमा आंशिक बादल लाग्नेछ भने बाँकी तराई भू-भागमा मौसम मुख्यतया सफा रहनेछ ।
रातिको समयमा कोशी, बागमती र गण्डकी प्रदेशका हिमाली तथा पहाडी भू-भागका थोरै स्थानहरूमा र लुम्बिनी तथा कर्णाली प्रदेशका हिमाली भू-भागका एक-दुई स्थानमा मेघगर्जन र चट्याङसहित मध्यमसम्मको वर्षा र हिमपातको सम्भावना छ । यसका साथै कोशी प्रदेशको तराई क्षेत्रका थोरै स्थानहरूमा पनि राति मेघगर्जनसहित मध्यम वर्षा हुन सक्ने मौसम पूर्वानुमान महाशाखाले जनाएको छ ।
