काठमाडौं। श्रम संस्कृति पार्टीले प्रतिनिधिसभाको बैठकमा सभामुखको कार्यशैलीप्रति तीव्र असन्तुष्टि जनाउँदै विरोध प्रदर्शन गरेको छ ।
सभामुख डोलप्रसाद अर्यालले प्रतिनिधिसभामै सांसदहरूलाई बोल्न नदिएको र विभेदपूर्ण व्यवहार गरेको भन्दै श्रम संस्कृति पार्टीका अध्यक्ष हर्क साम्पाङ (राई) लगायत सो पार्टीका सांसदहरूले उठेर विरोध जनाएका हुन् ।
बैठकको सुरुमै उठेर विरोध जनाएका अध्यक्ष राई र उनको पार्टीका सांसदहरूले पछि प्लेकार्ड र पर्चा बोकेर वेल घेराउ गर्दै नाराबाजीसमेत गरेका छन् । उनीहरूले सदनभित्र आफूहरूलाई विभेद भएको भन्दै सभामुखको भूमिकामाथि गम्भीर प्रश्न उठाएका छन् ।
सभामुखको स्पष्टीकरण
श्रम संस्कृति पार्टीका सांसदहरूको नाराबाजी र अवरोधका बीच सभामुख अर्यालले सदनलाई अगाडि बढाउने प्रयास गरेका थिए । सो क्रममा सभामुख अर्यालले सरकारको तर्फबाट परराष्ट्रमन्त्री शिशिर खनालको मन्तव्य चलिरहेको र विरोध जनाइरहेका सांसदहरूको रोष्टममा गएर बोल्ने तयारी नरहेकाले तत्काल समय दिन नसकेको स्पष्ट पारेका थिए ।
सभामुखले नियम र प्रक्रियाको कुरा उठाउँदै बैठक अगाडि बढाउन खोजे पनि श्रम संस्कृति पार्टीका सांसदहरूले वेल घेराउ जारी राखेका थिए । प्रतिपक्षको नाराबाजी र विरोधका बाबजुद सभामुखले संसदको कार्यसूचीलाई निरन्तरता दिएपछि सदनमा केही बेर तनावपूर्ण स्थिति सिर्जना भएको थियो ।
