काठमाडौं। जल तथा मौसम विज्ञान विभाग, मौसम पूर्वानुमान महाशाखाका अनुसार आज देशका विभिन्न भूभागमा आंशिक बदलीदेखि वर्षात्को सम्भावना रहेको छ।
आज दिउँसो कोशी प्रदेशलगायत देशका हिमाली र पहाडी भूभागमा साधारणतया बादल लाग्ने अनुमान गरिएको छ भने तराईका भूभागहरूमा आंशिक बदलीको अवस्था रहनेछ।
यसैगरी कोशी, बागमती, गण्डकी र लुम्बिनी प्रदेशका केही स्थानहरूका साथै मधेस, कर्णाली र सुदूरपश्चिम प्रदेशका हिमाली तथा पहाडी भूभागका थोरै स्थानमा मेघगर्जन र चट्याङसहित मध्यम वर्षाको सम्भावना रहेको छ।
सुदूरपश्चिम प्रदेशको तराई भूभागका एकदुई स्थानमा समेत हल्कादेखि मध्यम वर्षा हुनसक्ने महाशाखाले जनाएको छ। वर्षाको सम्भावना रहे तापनि आज लुम्बिनी र सुदूरपश्चिम प्रदेशका तराई भूभागका थोरै स्थानहरूमा भने तातो हावा चल्ने र अत्यधिक गर्मी हुने सम्भावना यथावत् रहेको छ।
महाशाखाका अनुसार आज रातिको समयमा पनि देशभर साधारणतया बादल लागिरहनेछ। राति मधेस प्रदेशलगायत कोशी, बागमती, गण्डकी र लुम्बिनी प्रदेशका पहाडी तथा तराई भूभागका केही स्थानहरूमा मौसम प्रभावित हुने देखिन्छ।
यसका साथै कर्णाली प्रदेशलगायत सबै प्रदेशका हिमाली भूभाग, सुदूरपश्चिम प्रदेशका पहाडी भूभागका थोरै स्थान र तराई भूभागका एकदुई स्थानमा मेघगर्जन र चट्याङसहित मध्यम वर्षाको सम्भावना रहेको मौसम पूर्वानुमान महाशाखाले जनाएको छ।
