काठमाडौं। आगामी असारमा हुने पहिलो ऐतिहासिक राष्ट्रिय महाधिवेशनको पूर्वसन्ध्यामा राष्ट्रिय स्वतन्त्र पार्टी (रास्वपा) ले आफ्नो सांगठनिक विस्तारलाई तीव्र पारेको छ। सोही अभियान अन्तर्गत आज आइतबार देशका विभिन्न २९ वटा जिल्लाहरूमा रास्वपाको जिल्ला अधिवेशन एकैसाथ सञ्चालन भइरहेको छ।
पार्टीका महामन्त्री कविन्द्र बुर्लाकोटीले दिएको जानकारी अनुसार आज सातै प्रदेशका विभिन्न जिल्लाहरूमा नयाँ नेतृत्व चयनका लागि अधिवेशनको प्रक्रिया अगाडि बढाइएको हो। हिजो शनिबार मात्रै पार्टीले देशका विभिन्न ३६ वटा जिल्लाहरूमा सफलतापूर्वक अधिवेशन सम्पन्न गरिसकेको छ।
महामन्त्री बुर्लाकोटीका अनुसार आज आइतबार कोशी प्रदेशका ४, मधेश प्रदेशका ४, बागमती प्रदेशका २ र गण्डकी प्रदेशका ४ वटा जिल्लामा अधिवेशन भइरहेको छ। त्यसैगरी लुम्बिनी प्रदेशका ३, कर्णाली प्रदेशका ६ र सुदूरपश्चिम प्रदेशका ६ वटा जिल्लाहरूमा पनि आजै प्रादेशिक संयोजन सहित जिल्ला कार्यसमिति चयनका लागि अधिवेशन सुरु भएको छ। संगठन भित्रको विशेष र प्राविधिक परिस्थितिका कारण मधेश प्रदेशको बारा जिल्लाको अधिवेशन भने आज नभई भोलि जेठ २६ गतेका लागि तय गरिएको पार्टीले जनाएको छ।
रास्वपाले आगामी असार ७ देखि ९ गतेसम्म चितवनमा हुने प्रथम राष्ट्रिय महाधिवेशन अगावै देशका कुल ७७ जिल्लामध्ये ६७ वटा जिल्लामा अधिवेशन सम्पन्न गरिसक्ने कडा सांगठनिक रणनीति तय गरेको छ।
आजको अधिवेशन सकिएसँगै पार्टीको मुख्य संगठन र बलियो पकड रहेका अधिकांश जिल्लाहरूको अधिवेशन तथा प्रतिनिधि छनोट प्रक्रियाले पूर्णता पाउनेछ। भौगोलिक विकटता र आन्तरिक तयारी नपुगेका कारण बाँकी रहेका १० वटा जिल्लाहरूको अधिवेशन भने चितवन महाधिवेशन सम्पन्न भए लगत्तै दोस्रो चरणमा गरिने रास्वपाले जनाएको छ।
