काठमाडौं। सामाजिक सञ्जाल टिकटकमा ‘तुलसा कलेक्सन’ नामबाट चर्चित टिकटकर तुल्सा अधिकारी पुर्पक्षका लागि जेल चलान भएकी छन् । जिल्ला अदालत ललितपुरका न्यायाधीश टेकनाथ गौतमको इजलासले बिहीबार भएको सुनुवाइपछि उनलाई थुनामा राखेर मुद्दाको किनारा लगाउन आदेश दिएको हो ।
कुमार चिमोरियाको जाहेरीका आधारमा अघि बढेको यस मुद्दामा जिल्ला सरकारी वकिल कार्यालयले तुल्सा र अशोककुमार अग्रवालसहित १० जनाविरुद्ध सम्पत्ति शुद्धीकरण (मनी लाउन्डरिङ) को मुद्दा दर्ता गरेको थियो ।
प्रतिवादीहरूविरुद्ध आपराधिक लाभ (एक्सटर्सन), संगठित अपराध र सम्पत्ति शुद्धीकरण समेतको कसुरमा मुद्दा चलाइएको हो । उनीहरूमाथि समूह नै बनाएर डर-धम्की देखाउँदै अवैध रूपमा रकम असुल गरेको र योजनाबद्ध तरिकाले आपराधिक क्रियाकलापमा संलग्न भएको गम्भीर आरोप छ ।
यसका साथै सरकारी वकिलको कार्यालयले उनीहरूमाथि हुन्डीमार्फत रकम पठाउने र पठाउन लगाउने कार्य गरी अवैध सम्पत्तिको स्रोत लुकाउने, रूपान्तरण गर्ने तथा हस्तान्तरण गर्ने गरेको अभियोग समेत लगाएको छ । अदालतको यो पछिल्लो आदेशसँगै अब टिकटकर अधिकारीसहितका आरोपीहरूले जेलभित्रै रहेर मुद्दाको पुर्पक्ष गर्नुपर्ने भएको छ ।
