काठमाडौं। नेपालमा हाल पश्चिमी वायु, स्थानीय वायु र पूर्वी भू-भाग नजिक रहेको न्यून चापीय क्षेत्रको संयुक्त प्रभाव देखिएको छ।
जल तथा मौसम विज्ञान विभाग, मौसम पूर्वानुमान महाशाखाका अनुसार देशको मध्य र पूर्वी भू-भागको उपल्लो वायुमण्डलमा न्यून चापीय रेखा समेत सक्रिय रहेकाले मौसममा उतारचढाव आइरहेको छ।
आज दिउँसो कोशी प्रदेश लगायत देशका अन्य पहाडी तथा हिमाली क्षेत्रमा साधारणतया बदली रहनेछ भने तराईका भू-भागमा आंशिक बदली हुने देखिन्छ। कोशी, बागमती र गण्डकी प्रदेशका पहाडी तथा हिमाली भू-भागका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ।
यस्तै, अन्य प्रदेशका पहाडी क्षेत्रका थोरै स्थान र तराईका एक-दुई स्थानमा समेत वर्षा र उच्च हिमाली भेगमा हिमपातको सम्भावना रहेको महाशाखाले जनाएको छ।
मौसममा आएको यो परिवर्तन रातिको समयमा पनि जारी रहने पूर्वानुमान गरिएको छ। राति कोशी, मधेस, बागमती र गण्डकी प्रदेश लगायतका पहाडी क्षेत्रमा मौसम सामान्यतया बदली रहनेछ।
कोशी, मधेस र बागमती प्रदेशका केही स्थानमा मेघगर्जन र चट्याङसहित वर्षा हुने र उच्च पहाडी तथा हिमाली क्षेत्रमा हिमपात हुन सक्ने देखिएकाले आवश्यक सतर्कता अपनाउन मौसमविद्हरूले आग्रह गरेका छन्। तराईका केही सीमित ठाउँमा पनि हल्का वर्षाको संकेत देखिएकाले कृषि र यातायात क्षेत्रमा विशेष ध्यान दिन सुझाव दिइएको छ।
