काठमाडौं। राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसईई) को नतिजा सार्वजनिक गरेको छ। सोमबार साँझ भक्तपुरको सानोठिमीस्थित परीक्षा नियन्त्रण कार्यालयमा आयोजित पत्रकार सम्मेलनमार्फत बोर्डले नतिजा सार्वजनिक भएको औपचारिक जानकारी दिएको हो।
सार्वजनिक विवरणअनुसार यस वर्षको परीक्षामा कूल ६५ दशमलव ९८ प्रतिशत विद्यार्थी उत्तीर्ण हुन सफल भएका छन्। बोर्डले पत्रकार सम्मेलनमा जानकारी दिए पनि विद्यार्थीहरूका लागि वेबसाइटमा नतिजा उपलब्ध हुन भने केही समय लाग्ने जनाएको छ।
गत चैत १९ गतेदेखि २९ गतेसम्म सञ्चालन भएको यस वर्षको एसईई परीक्षामा सहभागी हुन देशभरबाट ५ लाख १२ हजार ४२१ जना विद्यार्थीले आवेदन फारम भरेका थिए। जसमध्ये नियमिततर्फ ४ लाख ४१ हजार ५६६ जना र ग्रेड वृद्धितर्फ ७० हजार ८५५ जना विद्यार्थी रहेका थिए। लैङ्गिक आधारमा हेर्दा २ लाख ५७ हजार ६१३ छात्रा, २ लाख ५४ हजार ८०१ छात्र र अन्य ७ जनाले परीक्षाका लागि फारम भरेको तथ्याङ्क बोर्डले सार्वजनिक गरेको छ।
विगतका वर्षहरूको तुलनामा यसपटक नतिजा प्रकाशन प्रक्रिया केही छिटो र प्रभावकारी देखिएको छ। यसको मुख्य कारण परीक्षा केन्द्रहरूमा नै उत्तरपुस्तिका परीक्षण गर्ने व्यवस्था मिलाइनुलाई मानिएको छ।
बोर्डका अनुसार स्थानीयस्तरमै उत्तरपुस्तिका जाँच्ने काम भएकाले समयमै काम सम्पन्न भई नतिजा छिटो सार्वजनिक गर्न सम्भव भएको हो। अहिले सार्वजनिक भएको नतिजा हेर्नका लागि बोर्डले विभिन्न आधिकारिक वेबसाइट र एसएमएस सेवाहरूको व्यवस्था गरेको छ, जुन केही समयपछि नै पूर्ण रूपमा सुचारु हुनेछन्।
