लुइजियाना। अमेरिकाको लुइजियाना राज्यस्थित श्रिभपोर्ट शहरमा भएको एक सामूहिक गोलीकाण्डमा ८ जना बालबालिकाको ज्यान गएको छ। आइतबार बिहान भएको यस दर्दनाक घटनामा ३१ वर्षीय बन्दुकधारी सामार एल्किन्सले आफ्नै ७ सन्तानसहित ८ बालबालिकाको हत्या गरेका छन्।
स्थानीय प्रहरीका अनुसार, घटना आइतबार बिहान सबेरै सुरु भएको थियो। बन्दुकधारीले शहरका विभिन्न स्थानमा पुगेर अन्धाधुन्ध गोली चलाएका थिए। प्रहरीले यस घटनालाई ‘घरेलु हिंसासँग सम्बन्धित भएको जनाएको छ।
मारिने बालबालिकाको उमेर १ देखि १४ वर्षको बीचमा रहेको बताइएको छ। गोलीबारीमा दुई महिलाहरू गम्भीर घाइते भएका छन्, जसमध्ये एक जना बन्दुकधारीकी श्रीमती हुन्।
घटनापछि बन्दुकधारी एल्किन्सले गाडी चोरेर भाग्ने प्रयास गरेका थिए। प्रहरीसँगको लखेटालखेट पछि भएको दोहोरो भिडन्तमा उनी मारिएका छन्।
अनुसन्धानकर्ताहरूका अनुसार, यो हत्याकाण्ड श्रिभपोर्टका तीन फरक–फरक घरहरूमा फैलिएको थियो। मारिने ८ बालबालिकामध्ये ७ जना एल्किन्सकै सन्तान थिए भने अन्य एक जना बालबालिका पनि त्यही घरमा रहेको बताइएको छ। घटना हुनुअघि एल्किन्सले सामाजिक सञ्जालमा आफ्ना सन्तानहरूसँगको तस्वीर सार्वजनिक गरेको पाइएको छ, जसले घटनालाई थप रहस्यमय र कारुणिक बनाएको छ।
श्रिभपोर्टका मेयर टम अर्सेन्क्सले यस घटनालाई शहरको इतिहासकै सबैभन्दा ‘दुःखद र भयावह’ अवस्था भन्दै शोक व्यक्त गरेका छन्। उनले भने, “यो हाम्रो समुदायका लागि निकै ठूलो आघात हो। यस्तो त्रासदी शब्दमा वर्णन गर्न सकिँदैन।”
त्यसैगरी, अमेरिकी संसदका सभामुख माइक जोनसनले पनि पीडित परिवारप्रति गहिरो समवेदना प्रकट गर्दै यस घटनालाई ‘हृदयविदारक’ भनेका छन्।
अमेरिकामा पछिल्ला वर्षहरूमा भएका सामूहिक हत्याकाण्डहरूमध्ये यो घटनालाई निकै गम्भीर रूपमा हेरिएको छ। घरभित्रै आफ्नै सन्तानमाथि गरिएको यस्तो प्रहारले आम मानिसमा सुरक्षाको विषयलाई लिएर थप चिन्ता र बहस सिर्जना गरेको छ। घटनाको थप अनुसन्धान लुइजियाना राज्य प्रहरीले गरिरहेको छ।
