वासिंटन। इरानसँगको बढ्दो तनावबीच अमेरिकी राष्ट्रपति डोनाल्ड ट्रम्पले युद्धलाई लामो समयसम्म नलम्ब्याउने स्पष्ट संकेत दिएका छन्। उनले आफ्ना निकट सल्लाहकारहरूलाई आगामी केही हप्ताभित्रै द्वन्द्व अन्त्य गर्ने लक्ष्य रहेको बताएको एक प्रतिवेदनले उल्लेख गरेको छ। यसले कूटनीतिक समाधानतर्फ अमेरिका झुकिरहेको संकेत गर्छ।
वाल स्ट्रिट जर्नलको प्रतिवेदनअनुसार, यस विषयमा जानकार व्यक्तिहरूलाई उद्धृत गर्दै ट्रम्पले निजी रूपमा द्वन्द्व अन्तिम चरणमा पुगेको विश्वास व्यक्त गरेका छन्। उनले सार्वजनिक रूपमा उल्लेख गरिसकेकाे चारदेखि छ हप्ताको समयसीमाभित्रै समाधान निकाल्नुपर्नेमा जोड दिएको बताइएको छ। यो समयसीमा सम्भवतः मे महिनाको मध्यतिर हुने भनिएको चीनका राष्ट्रपति सी जिनपिङसँगको सम्भावित शिखर भेटअघि पर्ने देखिन्छ।
बिहीबार आयोजित एनआरसिसीको वार्षिक कोष सङ्कलन कार्यक्रममा ट्रम्पले आफूले आठ वटा युद्ध समाधान गरिसकेको दाबी गरेकाे र इरानको सन्दर्भमा पनि त्यही उपलब्धि दोहोरिने विश्वास व्यक्त गरे। उनले इरान वार्तामा संलग्न रहेको तर सार्वजनिक रूपमा स्वीकार गर्न हिच्किचाइरहेको टिप्पणी गरे। उनका अनुसार इरानभित्रैका शक्तिहरूबाट खतरा हुने डरका कारण उनीहरू खुला रूपमा सम्झौता गर्न सकिरहेका छैनन्, साथै अमेरिकी दबाब पनि उनीहरूका लागि चिन्ताको विषय बनेको छ।
यसैबीच, ह्वाइट हाउसकी प्रेस सचिव क्यारोलिन लेभिटले राष्ट्रपति ट्रम्पको प्राथमिकता शान्ति रहेको दोहोर्याएका छन्। उनका अनुसार इरानले वार्ताको संकेत देखाएपछि केही आक्रमण योजनाहरू स्थगित गरिएको हो। ट्रम्पको कडा चेतावनीपछि इरान वार्तामा आउन तयार देखिएको दाबी गर्दै लेभिटले पछिल्ला केही दिनदेखि वार्ता ‘फलदायी’ भइरहेको बताए।
उनले थप स्पष्ट पार्दै इरानलाई पुनः गलत आकलन नगर्न चेतावनी दिए। पछिल्लो तनावका क्रममा इरानले आफ्नो उच्च नेतृत्व, नौसेना, वायु सेना र हवाई प्रतिरक्षा प्रणालीमा ठूलो क्षति व्यहोरेको उल्लेख गर्दै, यदि इरानले वास्तविकता स्वीकार नगरेमा अमेरिका थप कडा कदम चाल्न तयार रहेको संकेत दिए।
तर अर्कोतर्फ, तेहरानले भने अमेरिकी प्रस्तावप्रति सकारात्मक प्रतिक्रिया दिएको छैन। इरानले द्वन्द्व अन्त्य आफ्नै सर्त र समयसीमामा मात्र सम्भव हुने अडान दोहोर्याएको छ। साथै आफ्नो माग पूरा नभएसम्म प्रतिरोध जारी राख्ने र आवश्यक परे ‘कडा प्रहार’ गर्ने चेतावनी दिएको छ।
_gDF6c1tHM9_20260311195551.jpg)
