काठमाडौं। नेपाली कांग्रेसका महामन्त्री गगन कुमार थापाले २०८४ को निर्वाचनअघि नै पार्टीको १५औं महाधिवशन हुने बताएका छन् । आज (शनिबार) कांग्रेस अर्घाखाँची–काठमाडौँ सम्पर्क समितिको पहिलो अधिवेशनलाई सम्बोधन गर्दै उनले यस्तो बताएका हुन् ।
उनले पार्टी सभापति शेरबहादुर देउवा पनि अधिवेशनको पक्षमा नै रहेको बताए । कांग्रेसलाई संविधान, ऐन, कानुन र विधानले बाँधेको बताउँदै २०८४ को निर्वाचनअघि अधिवेशन नगराएर धर नरहेको बताएका ह्ुन् ।
‘नेपालको संविधान, कानुन सबै कुराले यो २०८४ को निर्वाचन पछाडि महाधिवेशन गर्ने भन्ने कुरा, त्यो हामीलाई गर्न दिँदैन । कतिजनाले साना एउटा पार्टी ल्याएर कांग्रेसमा मिसाइदियो भने समय थप्न मिल्छ कि भन्यो भनेत, त्यसो हो भने कुनै पनि पार्टीले कहिले पनि महाधिवेशन नगरे हुन्छ । यस्तो हावादारी कुरा हाम्रो संविधान, कानुनले परिकल्पना गरेको छैन । यस्तो चाहीँ भएको पार्टी विघटन गरेमात्रै हुन्छ । अधिवेशन २०८२ मा र ०८३ मा हुन्छ । अधिवेशनको पक्ष र विपक्षमा बहस नगरौं । पार्टी सभापति पनि अधिवेशनको पक्षमा हुनुहुन्छ । यो अधिवेशनको पक्ष, यो विपक्ष भनेर किन भन्नुपर्दैन भने हाम्रो संविधान, विधान, देशको कानुनले हामीलाई बाँधेको छ । यो भन्दा बाहिर हामीहरु कोही पनि जान सक्दैनौं,’– उनले भने ।
महामन्त्री थापाले वर्तमान सत्ता गठबन्धनको सरकारलाई तीन वर्षसम्म चल्न दिनुपर्ने बताए । उनले यस अवधिको सम्पूर्ण जिम्मेवारी कांग्रेस–एमालेले लिनुपर्ने पनि बताए । पटक–पटक गठबन्धनको सरकार बन्ने र सरकारले गरेका कामको जिम्मा नलिने परम्परालाई तोड्न आवश्यक रहेको महामन्त्री थापाले बताए ।
