काठमाडौं। पूर्वक्रिकेटर तथा कमेन्टेटर नवजोत सिंह सिद्धु नेटफ्लिक्सको ‘द ग्रेट इन्डियन कपिल शो’मा फर्किने तयारीमा छन् ।
आगामी एपिसोडमा कपिलले नवजोत सिंह सिद्धुलाई बोलाएका हुन् । आगामी सप्ताहान्तमा प्रसारण गरिने यो शोमा कपिलले आफ्ना दर्शहरूको पुरानो याद ताजा बनाउँदैछन् ।
हालै मात्र शोको नयाँ प्रोमो सार्वजनिक भएको छ । नयाँ प्रोमोमा कपिलले नवजोत सिंह सिद्धुको कमब्याकको मजाक उडाउँदै सुनिल ग्रोवर उनको नक्कल गर्न निपुण भएको बताएका छन् ।
शोमा सुनिल सिद्धु बनेर आएका छन् । सक्कली सिद्धुले पनि उनलाई असली सिद्धु भन्छन् । सिद्धुलाई जजको कुर्सीमा देखेर अर्चना पूरन सिंह तर्सिन्छिन् अनि कपिललाई शोको जज फेरेको हो भनेर सोध्छिन् । यसैबिच सबै जना हसिमजाक गर्छन् ।
कपिलले कुनै समय आफूले चलाएको शो ‘द कपिल शर्मा शो’का पूर्व जज समेत रहेका सिद्धुले सन् २०१९ मा शो छोडेका थिए ।
सन् २०१९ मा भएको पुलवामा हमलापछि उनले आतंकवादी हमलाबारे सिद्धुले आतंकवादलाई सम्पूर्ण देशसँग जोड्नु हुँदैन र शत्रुतामा वार्ताको आवश्यकतामाथि जोड दिएका थिए ।
उनको यो टिप्पणीले निकै विवाद सिर्जना भयो र उनलाई शोबाट हटाउन माग चर्कियो । जनआक्रोशको कारण अन्ततः कपिलले उनको स्थानमा अर्चना पूरन सिंहलाई जजको रुपमा ल्याए ।
