काठमाडौं। तोहुरा खातुनको ह्याट्रिकसँगै बंगलादेशले भुटानलाई पराजित गर्दै साफ वुमन्स च्याम्पियनसिप-२०२४ को फाइनलमा प्रवेश गरेको छ।
त्रिपुरेश्वरस्थित दशरथ रंगशालामा आज भएको पहिलो सेमिफाइनल खेलमा बंगलादेशले भुटानलाई ७-१ को फराकिलो गोलअन्तरले पराजित गर्दै प्रतियोगिताको फाइनलमा पुगेको हो।
बंगलादेशकी तोहुरा खातुनले ह्याट्रिक गरिन्। त्यस्तै साविना खातुनले दुई गोल गर्दा ऋतु पोर्ना चक्मा र सेउली अजिम समान एक-एक गोल गरेका हुन्। भुटानका लागि डेकी लाजोमले एक गोल फर्काइन्। प्रतियोगिताअन्तर्गत दोस्रो सेमिफाइनल आज साँझ ६ः३० बजे नेपाल र भारतबीच प्रतिस्पर्धा हुँदैछ।
