काठमाडौं । प्रहरी नियमावली परिवर्तन नभए नेपाल प्रहरीका वरिष्ठ उपरीक्षक (एसएसपी)देखि अतिरिक्त महानिरीक्षक (एआईजी)सम्मका झन्डै २२ जना प्रहरी अधिकारीहरू ६ महिनाभित्रै अवकाशमा जाने भएका छन् । उनीहरू उमेरहद र ३० वर्षे सेवाअवधिका कारण अवकाशमा जान लागेका हुन् ।
प्रहरीमा उमेरहद, सेवाअवधि र पदावधि जुन पहिले आउँछ, त्यहीअनुसार अवकाश हुने व्यवस्था छ । प्रहरी प्रधान कार्यालयका अनुसार, चार जना एआईजी, आठ जना नायव महानिरीक्षक (डीआईजी) र १० जना एसएसपी अवकाशमा जाँदै छन् । उनीहरू उमेरहद र ३० बर्से सेवाअवधिका कारण अवकाशमा जान लागेका हुन् ।
सेवाअवधिका कारण अवकाशमा जानेको संख्या भने शून्य छ । यो अवधिमा सबैभन्दा पहिला अवकाशमा डीआईजी विष्णुकुमार केसी र कृष्णहरि शर्मा पोखरेल जाँदै छन् । बाग्मती प्रदेश प्रहरी प्रमुखसमेत रहेका डीआईजी केसी ३० वर्षे सेवाअवधिका कारण र पोखरेल ५६ वर्षको उमेर हदका कारण अवकाशमा जान लागेका हुन् ।
१६ भदौ २०५१ सालमा प्रहरी सहायक निरीक्षकमा भर्ना भएका केसी पछि प्रहरी निरीक्षकमा नाम निकाल्न सफल भएका थिए । उनी आगामी १५ भदौमा अनिवार्य अवकाशमा जाने भएका छन् । पोखरेल भने प्रहरी महानिरीक्षक (आईजीपी) वसन्तबहादुर कुँवरका ब्याची हुन् । उनीहरू अब तीन साता पनि प्रहरीको बर्दीमा देखिने छैनन् ।
यस्तै, डीआईजी केसीसँगै प्रहरी सहायक निरीक्षकमा भर्ना भएका १० जना एसएसपी पनि उनीसँगै अवकाशमा जाने भएका छन् । एसएसपी दिनेशराज मैनाली, जीवनकुमार श्रेष्ठ, किसनसिंह थापा, दिल्लीराज बिष्ट, रविकुमार पौडेल, रेवती ढकाल, चन्द्रदेव राई, बेलबहादुर पाण्डे, नवीनराज राई र वीरबहादुर वली ३० बर्से सेवाअवधिका कारण आगामी १५ भदौमा एकसाथ अवकाशमा जाँदै छन् ।
१६ भदौ २०५१ सालमा प्रहरी सहायक निरीक्षकमा भर्ना भएका उनीहरूले पछि प्रहरी निरीक्षकमा नाम निकालेका थिए । यी १० जना एसएसपी र एक जना डीआईजी अवकाशमा गएको डेढ सातामै एआईजी श्यामलाल ज्ञवालीले पनि प्रहरीको बर्दी फुकाल्नेछन् । प्रहरीको केन्द्रीय अनुसन्धान ब्युरो (सीआईबी)को प्रमुखबाट केही दिनअघि हटाइएका एआईजी श्यामलाल ज्ञवाली आगामी २६ भदौमा ५६ बर्से उमेर हदका कारण अवकाशमा जान लागेका हुन् । ज्ञवाली प्रहरी महानिरीक्षक कुँवरकै ब्याची हुन् ।
प्रहरी संगठनविपरीत काम गरेको भन्दै उनको विषयमा प्रहरी प्रधान कार्यालयले एआईजी टेकप्रसाद राईको संयोजकत्वमा पाँच सदस्यीय छानबिन समिति गठन गरेको छ । एआईजी ज्ञवालीमाथि प्रहरीको उजुरी छानबिन निर्देशनालयमा उजुरी परेकाले छानबिनका लागि समिति गठन गरिएको हो । उमेर विवाद, ६० किलो सुन प्रकरणमा फरार रहेका जीवन चलाउनेको विषयलगायतमा छानबिन गर्न समिति बनाइएको प्रहरी प्रधान कार्यालयले बताएको छ ।
संगठनमा चेन अफ कमान्डलाई बाइपास गरेर काम गरेको आरोप पनि ज्ञवालीमाथि लगाइएको छ । आरोप पुष्टि भए उनी बर्खास्तीमा पर्नेछन् । ज्ञवाली तिनै एआईजी हुन्, जसलाई तत्कालीन उपप्रधानमन्त्री एवं गृहमन्त्री रवि लामिछानेले आईजीपी बनाउन मरिहत्ते गरेका थिए । तत्कालीन प्रधानमन्त्री पुष्पकमल दाहाल ‘प्रचण्ड’ र तत्कालीन सत्ता साझेदार दलको प्रमुख घटक एमाले अध्यक्ष केपी शर्मा ओलीको असहमतिका कारण गृहमन्त्री लामिछानेको प्रयास असफल भएको थियो ।
यस्तै, एआईजी किरण बज्राचार्य र भीमप्रसाद ढकाल पनि अब लामो समय प्रहरीको बर्दीमा देखिने छैनन् । बज्राचार्य आगामी १६ पुस र ढकाल २८ मंसिरमा ५६ बर्से उमेर हदका कारण अनिवार्य अवकाशमा जाँदै छन् । हाल काठमाडौं उपत्यका प्रहरी कार्यालयमा कार्यरत बज्राचार्यलाई लामिछानेले गृहमन्त्रीको जिम्मेवारी लिएलगत्तै सीआईबीबाट कार्य विभागमा सरुवा गरेका थिए । उनी आईजीपी कुँवरकै ब्याची हुन् ।
आईजीपी कुँवरकै ब्याचका एआईजीहरू सन्दीप भण्डारी, मीरा चौधरी र उमेशराज जोशीले ५६ बर्से उमेरहदका कारण अवकाश पाइसकेका छन् । ढकाल भने केही महिनाअघि मात्रै एआईजी बनेका थिए । एआईजी बनाउने बेला तत्कालीन गृहमन्त्री लामिछानेको उनलाई राम्रै आशीर्वाद प्राप्त भएको थियो । सोही कारण उनलाई मानव स्रोत विकास विभागमा पदस्थापन गरिएको थियो ।
यो विभाग एआईजीको पहिलो रोजाइमा पर्नेगर्छ । यसैगरी, डीआईजी यज्ञविनोद पोखरेल (हाल मधेस प्रदेश प्रमुख) १४ असोजमा उमेर हदका कारण अवकाश जाँदै छन् । डीआईजी अर्जुन चन्द ठकुरी (कर्णाली प्रदेश प्रमुख) १ पुसमा अवकाशमा जाँदै छन् । हालै एआईजीमा बढुवा भएका रामदत्त जोशी १८ कात्तिकमा अवकाशमा जाने भएका छन् ।
एआईजी उमेशराज जोशीले अवकाश पाएपछि रिक्त स्थानमा उनलाई बढुवा गरिएको थियो । उनलाई प्रहरी प्रधान कार्यालयको कार्य विभागमा पदस्थापन गरिएको छ । उनी ५६ बर्से उमेर हदका कारण १८ कात्तिकमै अवकाशमा जाने भएका हुन् । यसैगरी, डीआईजी किरण राणा १६ कात्तिकमा, केदार ढकाल २२ मंसिरमा र भरतबहादुर बोहरा १४ पुसमा अवकाशमा जानेछन् ।
उनीहरू सबै ५६ वर्ष पूरा भएका कारण अनिवार्य अवकाश हुन लागेका हुन् । यस्तै, राजेशनाथ बास्तोला ११ कात्तिकमा र कृष्णहरि शर्मा पोखरेल १५ भदौमा अवकाश हुनेछन् । बास्तोलाको ३० वर्ष सेवाअवधि पूरा हुन एक वर्षभन्दा बढी समय बाँकी छ । उनी २७ कात्तिक २०५२ सालमा भर्ना भएका हुन् । यसैगरी, प्रहरी महानिरीक्षक कुँवरसँगै प्रहरी सेवामा प्रवेश गरेका एसएसपी भोलाबहादुर रावलले १२ माघमा र गणेश चन्दले २५ मंसिरमा अवकाश पाउनेछन् ।
नेपाल प्रहरीमा दुई जना डीआईजी खाली हुन लागेकाले उनीहरू डीआईजीमा बढुवा हुने सम्भावना छ । तर, उनीहरू ५६ वर्ष उमेर हदका कारण थोरै समय मात्र डीआईजी बन्नेछन् । यस्तै, एसएसपी गणेश चन्द पनि २५ मंसिरमा नै अवकाश हुनेछन् ।
राजधानी दैनिकबाट
