स्विडेनले उपाधिको बलियो दावेदार रहेको पूर्वविजेता जापानलाई २–१ ले स्तब्ध पार्दै महिला विश्वकप २०२३ को सेमिफाइनल यात्रा तय गरेको छ ।
स्विडेनले अब अन्तिम चारको खेलमा स्पेनको सामना गर्नेछ । जापान सन् २०११ को विश्वकप विजेता पनि हो । जापान बाहिरिएसँगै यसपल्टको विश्वकपले नयाँ विश्व च्याम्पियन पाउने भएको छ । यसअघि विश्वकप जितेका सबै टिमको चुनौती यसपल्टको प्रतियोगितामा सकिएको छ ।
स्विडेनका लागि अमन्डा इलेस्टेडले ३२ औं मिनेटमा पहिलो गोल गरिन् । दोस्रो हाफको ५१ औं मिनेटमा फिलिपा एन्जेलडालले दोस्रो गोल थपिन् । उनले पेनाल्टीबाट गोल गरेकी हुन् ।
जापानका लागि होनोका हयासीले ८७ औं मिनेटमा एक गोल फर्काइन् । त्यसअघि जापानकी रिको युकी ७६ औं मिनेटमा पेनाल्टीबाट गोल गर्न चुकेकी थिइन् ।
