जनकपुरधाम । जनकपुरको एक होटलमा बालिकालाई तीन दिनसम्म बन्धन बनाएर सामूहिक बलात्कार गरेको आरोपमा धुनषा प्रहरीले दुई युवकलाई पक्राउ गरेको छ ।
पक्राउ पर्नेहरूमा धनुषाको बिदेह नगरपालिका वडा नंं ४, ढाडीका ३० वर्षीय जितेन्द्रकुमार महरा र सोही स्थानका ३२ वर्षीय अरुणकुमार महरा रहेको जिल्ला प्रहरी कार्यालय धनुषाले जनाएको छ ।
प्रहरीले जितेन्द्रलाई जनकपुरबाट र अरुणलाई बिदेह नगरपालिकाबाट नियन्त्रणमा लिएको हो ।
बेपत्ता भएको तीन दिनपछि घर आएकी बालिकाले घटनाबारे जानकारी गराएपछि बालिकाकी सानीआमा पर्नेले प्रहरीमा जाहेरी दिएकी थिइन् ।
जाहेरीकै आधारमा प्रहरीले उनीहरुलाई पक्राउ गरेको जिल्ला प्रहरी कार्यालय धनुषाका प्रवक्ता तथा प्रहरी नायब उपरीक्षक जितेन्द्रकुमार बस्नेतले जानकारी दिए ।
आरोपितहरूले भतिजी नाता पर्ने बालिकालाई जनकपुरको शिवचौकस्थित एक होटलमा बन्धक बनाएर असोज ३ गतेदेखि ६ गतेसम्म जबरजस्ती करणी गरेको आरोप छ ।
उनीहरुलाई जिल्ला अदालत धनुषाबाट म्याद थप गरी हिरासतमा राखेर घटनाको थप अनुसन्धान गरिरहेको प्रहरीले जनाएको छ ।
बालिकाकी आमाको मृत्यु भइसकेको र बुवाको मानसिक सन्तुलन ठिक नभएको स्थानीयले जानकारी दिएको छ ।
