काठमाडौं । गण्डकी प्रदेशको प्रमुखबाट पदमुक्त भएका अमिक शेरचनले पदबाट बाहिरिँदा आफू अत्यन्तै खुशी भएको बताएका छन्। मंगलबार बिहान पत्रकार सम्मेलन गर्दै शेरचनले आफूलाई पदमुक्त गरेकोमा राष्ट्रपतिलाई समेत धन्यवाद दिएका थिए।
‘पदमुक्त भएकोमा अत्यन्तै खुशी छु। मुरीमुरी धन्यबाद छ राष्ट्रपतिज्यूलाई,’ उनले भनेका छन्,‘ अधिकारविहीन खुला जेलबाट मुक्त गरिदिनु भएकोमा पनि धन्यबाद ।’शेरचनले आफूले पदका लागि राजनीतिक नगरेको भन्दै विभिन्न समयमा आएका लाभका पदहरु अस्वीकार गर्दै आएको जनाएका छन्। ‘पद र सत्ताका लागि असम्वैधानिक पद्धति र अपाच्य दृश्य थोर्पाने पद जोगाउने व्यक्ति म होइन,’ उनले भनेका छन्।
आफू पदमा आएपछि संवैधानिक मर्यादालाई पूर्णपालना गरेको र कुनैपनि पार्टी विशेषको प्रभाव र छायाँमा काम नगरेको उनले स्पष्ट पारेका छन्।देश कोभिड–१९ विरुद्ध एकजुट भएर लड्नुपर्ने बेलामा दलहरुबीच पार्टी पार्टी बीचको फुट, पद र सत्तालिप्साको खेलमा देशलाई चुर्लुम्म डुबाइएको भन्दै उनले आक्रोश पोखेसमेत पोखेका छन्।
‘आज देश कोभिडबाट आतंकीत र अक्रान्त बनेको छ । दैनिक मृत्युदर बढिरहेको छ, यस्तो अवस्थामा सम्पूर्ण राजनीतिक दलहरुको साझा सहमति र सहकार्यमा देशव्यापी सचेतना अभियान चलाई जनताको जिउ धनको रक्षा गर्नुपर्ने अहम् बेलामा पार्टी पार्टी बीचको फुट, पद र सत्तालिप्साको खेलमा देशलाई चुर्लुम्म डुवाइएको छ,’ उनले भनेका छन्।
