काठमाडौं । अमेरिकामा २ करोड २९ लाखमा कोरोना भाइरसको संक्रमण पुष्टि भएको छ ।पछिल्लो २४ घण्टामा २ लाख १३ हजार ४५३ जनामा संक्रमण पुष्टि भएको छ । यसअघि २७ मंसिरमा एकैदिन अहिलेसम्मकै धेरै ३ लाख ८६ हजार ६५४ जनामा संक्रमण भएको थियो ।
पछिल्लो वृद्धिसँगै अमेरिकामा संक्रमितको संख्या २ करोड २९ लाख १७ हजार ३३४ पुगेको छ । संक्रमितमध्ये अहिलेसम्म १ करोड ३४ लाख ८३ हजार ४९० जना संक्रमणमुक्त भएका छन् ।
उपचार गराइरहेका ९० लाख ५० हजार ५६९ जनामध्ये २८ हजार ९३१ जनाको अवस्था गम्भीर रहेको वर्ल्डोमिटर्सले जनाएको छ । यस्तै पछिल्लो २४ घण्टामा त्यहाँ १ हजार ७९२ कोरोना संक्रमितको मृत्यु भएको छ ।
तथ्याङ्क अद्यावधिक गरिरहेको साइट वर्ल्डोमिटर्सका अनुसार पछिल्लो वृद्धिसँगै सोमबार बिहानसम्म अमेरिकामा कोरोनाले ज्यान गुमाउनेको संख्या ३ लाख ८३ हजार २७५ पुगेको छ ।
