काठमाडौं । कोभिड कहरबीच अस्ट्रेलियामा रहेका नेपाली विद्यार्थीको अवस्था र सहजीकरणबारे नेपाल शैक्षिक परामर्श संघ (इक्यान) ले क्रियाशीलता देखाएको छ । संघले शुक्रबार अस्ट्रेलियाका लागि नेपाली राजदूत महेशराज दाहालसँग छलफल गरेको छ ।
इक्यानद्वारा शुक्रबार आयोजित वेबिनारमा राजदूत दाहालले विदेशमा रहेका विद्यार्थीबारे उचित चासो राख्न सुझाव दिए । पेशागत इमानदारिता कायम राखेर काम गर्न पनि दाहालले सुझाए । धेरै परामर्शदाताले राम्रो काम गरे पनि केहीले व्यवसायिक लाभभन्दा माथि नहेरको पनि राजदूत दाहालले टिप्पणी गरे ।
विद्यार्थीहरुले पाइरहेका दुःखबारे सहजीकरण गर्ने र उनीहरुलाई सहयोग गर्न परामर्शदाताको भूमिका महत्वपूर्ण हुने दाहालले बताए । विदेशमा रहेका विद्यार्थीबारे संघले पनि उत्तरदायित्व बहन गर्नुपर्ने दाहालले धारणा राखे । उनले अस्ट्रेलियामा रहेका नेपालीबारेमा दूतावासले जानकारी लिइरहेको र सहयोगका लागि विभिन्न संघ संस्थासँग समन्वय गरिरहेको पनि बताए ।
वेबिनारमा इक्यानका केन्द्रीय अध्यक्ष प्रकाश पाण्डेले विद्यार्थीको हकहितका लागि आफूहरु गम्भीर रहेको बताए । कोरोना कहर बढेसँगै उच्च शिक्षाका लागि विदेशमा रहेका नेपाली विद्यार्थीहरुको अवस्थाप्रति शैक्षिक परामर्शदातृ निकाय चिन्तित रहेको पाण्डेले बताए । त्यसका लागि आवश्यक समन्वय भइरहेको उनले जानकारी दिए ।
इक्यानले कोरोना महामारी फैलिएपछि उच्च शिक्षाका लागि विदेशमा रहेका नेपाली विद्यार्थीलाई सहयोग गर्न आपतकालीन फारममार्फत समस्या दर्ता प्रक्रिया पनि थालेको छ । उक्त फारममा विद्यार्थीले आफ्नो समस्या दर्ता गर्न सक्नेछन् । यस बाहेक इक्यानले ‘इक्यान कोभिड–१९ आपतकालीन रजिष्ट्रेसन फारम’ को पनि सुरुवात गरेको छ ।
वेबिनारमा इक्यान पदाधिकारी तथा पूर्व अध्यक्षहरुको सहभागिता थियो।
-1732430808_20241124123911.jpg)
