काठमाडौं। तेस्रो संस्करणको नेपाल प्रिमियर लिग (एनपीएल) अन्तर्गत प्लेअफमा पुग्ने चारै टोलीको समीकरण पूरा भएको छ। कीर्तिपुरस्थित त्रिवि क्रिकेट मैदानमा सम्पन्न रोमाञ्चक भिडन्तमा साविक विजेता लुम्बिनी लायन्ससँग ४ विकेटले पराजित भएसँगै विराटनगर किंग्सको प्लेअफ यात्रामा पूर्णविराम लागेको हो।
विराटनगरले प्रस्तुत गरेको १६७ रनको चुनौतीपूर्ण लक्ष्य लुम्बिनीले १९.५ ओभरमा ६ विकेट गुमाउँदै पूरा गर्यो। लुम्बिनीको जितमा ओपनरद्वय डार्सी सर्ट र आसिफ शेखले समान ४५–४५ रनको महत्त्वपूर्ण पारी खेले। यस्तै, अली शेखले २७ र सन्दीप जोराले अविजित २५ रन जोड्दै टोलीलाई जितनजिक पुर्याए भने अन्तिम क्षणमा रुवेन ट्रम्पलमानले छक्का प्रहार गर्दै लुम्बिनीको जित सुनिश्चित गरे। बलिङतर्फ विराटनगरका अपराजित पौडेलले २ तथा चरिथ असलंका र रुपेश सिंहले १–१ विकेट लिए।
यसअघि टस हारेर पहिले ब्याटिङको निम्तो पाएको विराटनगरले निर्धारित २० ओभरमा ४ विकेट गुमाउँदै १६६ रनको योगफल खडा गरेको थियो। विराटनगरका लागि चरिथ असलंकाले ४३ बलमा ६ छक्का र १ चौका प्रहार गर्दै ६४ रनको शानदार अर्धशतकीय पारी खेले। त्यस्तै, शुभम रन्जानेले अविजित ३१, इमरान शेखले २४ र लोकेश बमले १५ रनको योगदान दिए। लुम्बिनीका बलर किशोर महतोले २ तथा अभिषेक गौतम र रुवेन ट्रम्पलमानले समान १–१ विकेट हात पारे।
यस नतिजासँगै प्रतियोगिताको प्लेअफ खेल्ने चार टोलीको टुङ्गो लागेको छ। लुम्बिनी लायन्ससँगै सुदूरपश्चिम रोयल्स, काठमान्डु गोर्खाज र चितवन राइनोजले अन्तिम चारमा स्थान सुरक्षित गरेका छन्। अर्कोतर्फ, पोखरा एभेन्जर्स, कर्णाली याक्स, जनकपुर बोल्ट्स र विराटनगर किंग्सको यात्रा भने समूह चरणबाटै टुङ्गिएको छ।
