काठमाडौं। नेपाली कांग्रेसमा आन्तरिक विवाद चुलिँदै गएको छ。 संस्थापन पक्षले १५औँ केन्द्रीय महाधिवेशन सम्पन्न गरी नयाँ नेतृत्व चयन गरिसक्दा पनि पूर्वसभापति शेरबहादुर देउवा पक्षले भने छुट्टै महाधिवेशनको तयारी तीब्र पारेको छ। पार्टीभित्रको वैचारिक र संगठनात्मक विवादका कारण कांग्रेसका गतिविधि अहिले दुई छुट्टाछुट्टै धारमा अघि बढेका छन्।
संस्थापन पक्षले केन्द्रीय महाधिवेशन गरिसकेको अवस्थामा देउवा समूहले आइतबारदेखि जिल्ला अधिवेशन सुरु गरेको छ। यसलाई देउवा समूहले आफ्नो संगठनात्मक गतिविधि निरन्तरता दिने रणनीतिक प्रयासका रूपमा हेरिएको छ। पार्टीको आधिकारिक संरचनाभन्दा बाहिर, जिल्ला तहमा यसरी समानान्तर रूपमा गतिविधि अघि बढाइएपछि कांग्रेसभित्रको विभाजनको रेखा अझ प्रस्ट भएको छ।
देउवा समूहको घोषित कार्यतालिका अनुसार कात्तिक १५ गते देशभर जिल्ला अधिवेशन गर्ने तयारी गरिएको थियो, यद्यपि स्थानीय परिस्थितिलाई मध्यनजर गर्दै केही जिल्लामा मिति परिवर्तन गरिएको छ। यसअघि संखुवासभा, डोल्पा, हुम्ला, जुम्ला, मुगु, रुकुम पश्चिम, कालिकोट, डोटी, बैतडी र रोल्पामा जिल्ला अधिवेशन सम्पन्न भइसकेको सो समूहले जानकारी दिएको छ। त्यस्तै, काठमाडौं जिल्ला अधिवेशन आगामी कात्तिक २१ गते गर्ने तयारी छ, जसको उद्घाटन पूर्वसभापति देउवा स्वयंले गर्ने कार्यक्रम तय गरिएको छ।
देउवा समूहले आगामी मंसिर ४ गते प्रदेश अधिवेशन तथा मंसिर २१ देखि २३ गतेसम्म काठमाडौंमा केन्द्रीय महाधिवेशन गर्ने गरी कार्यतालिका सार्वजनिक गरेको छ। यसअघि उनीहरूले वडा, पालिका, प्रदेशसभा र प्रतिनिधिसभा निर्वाचन क्षेत्रीय अधिवेशनको प्रक्रिया समेत अघि बढाइसकेका थिए।
अर्कोतर्फ, सभापति गगन थापा नेतृत्वको कांग्रेस पक्षले गत असोज १६ देखि १९ गतेसम्म १५औँ केन्द्रीय महाधिवेशन सम्पन्न गरी नयाँ नेतृत्व चयन गरिसकेको छ। संस्थापन पक्षले केन्द्रीय महाधिवेशन सम्पन्न गरे पनि तल्लो तहका जिल्ला र प्रदेश अधिवेशन नगरी नै नेतृत्व चयन गरेको थियो। तर, देउवा समूहले भने वडा तहदेखि नै प्रक्रिया सुरु गरेर छुट्टै केन्द्रीय नेतृत्व चयन गर्ने अडान लिएको छ।
यस परिस्थितिमा सभापति गगन थापाले देउवा समूहलाई अलग्गै महाधिवेशन गर्ने गतिविधि रोकेर पार्टीको मूल प्रक्रियामा सहभागी हुन बारम्बार आग्रह गर्दै आउनुभएको छ। पार्टीभित्र एकता कायम राख्न आफू जुनसुकै लचकता अपनाउन तयार रहेको सार्वजनिक अभिव्यक्ति उहाँले दिनुभए पनि देउवा समूहले आफ्नो छुट्टै महाधिवेशनको मार्ग नरोकेको प्रस्ट भएको छ। यसरी नेपाली कांग्रेसमा अहिले दुई फरक नेतृत्व र समानान्तर संगठनात्मक गतिविधिहरू एकसाथ अघի बढिरहेका छन्।
