तेहरान । इरानले रणनीतिक रूपमा महत्त्वपूर्ण मानिने हर्मुज जलमार्ग पुनः खोल्नका लागि मध्यस्थकर्तामार्फत संयुक्त राज्य अमेरिकासामु आफ्ना कडा सर्तहरू अघि सारेको छ। इरानका मुख्य वार्ताकारले आइतबार यस कुराको पुष्टि गरेका हुन्। मध्यपूर्वमा जारी युद्धका क्रममा इरानले यो प्रमुख जलमार्गमा आफ्नो पूर्ण नियन्त्रण कायम राख्दै आएको छ।
गत फेब्रुअरीको अन्त्यतिर अमेरिका र इजरायलको संयुक्त हमलापछि सुरु भएको मध्यपूर्व द्वन्द्वका कारण अमेरिका र इरानबीच लामो समयदेखि सैन्य र कूटनीतिक गतिरोध जारी छ। तेहरानले विश्वको तेल र ग्यास आपूर्ति मार्गका रूपमा रहेको हर्मुज जलसन्धिमा कडा नियन्त्रण जमाएपछि वासिङ्टनले पनि इरानी बन्दरगाह र अर्थतन्त्रलाई लक्षित गरी विभिन्न अभियानहरू सञ्चालन गर्दै आएको छ।
इरानी संसद्का सभामुख एवं मुख्य वार्ताकार मोहम्मद बाघेर गालिबाफका अनुसार मध्यस्थकर्तामार्फत वासिङ्टनलाई इरानका सर्तहरू स्पष्ट रूपमा बुझाइसकिएको छ। "जबसम्म हाम्रा सर्तहरू पूरा हुँदैनन् र अमेरिकी प्रतिबद्धताहरू पालना हुँदैनन्, तबसम्म हर्मुज जलमार्ग खुला गर्ने र वार्ताअघिको अवस्थामा फर्कने कुनै सम्भावना छैन," राष्ट्रिय टेलिभिजनलाई दिएको अन्तर्वार्तामा गालिबाफले भने।
इरानको सर्वोच्च राष्ट्रिय सुरक्षा परिषद्का प्रमुख मोहसेन रेजाइले मध्यस्थकर्ता कतारमार्फत आफ्ना सर्तहरू अमेरिका पठाइएको पुष्टि गरेका छन्। अल-जजिरासँग कुरा गर्दै उनले भने, "हाम्रा सर्तहरूमा सबै मोर्चामा जारी युद्धको अन्त्य, रोक्का गरिएका इरानी कोषहरूको फुकुवा र नौसेना नाकाबन्दीको अन्त्य रहेका छन्।"
कूटनीतिक प्रयासलाई तीव्रता दिन मध्यस्थकर्ता देश पाकिस्तानका गृहमन्त्री मोहसिन नक्वी आइतबार थप वार्ताका लागि तेहरान पुग्ने कार्यक्रम रहेको इरानी अधिकारीहरूले जनाएका छन्।
यसैबीच, इरानको खातम अल–अनबिया केन्द्रीय सैन्य कमान्डले संयुक्त राज्य अमेरिकालाई कडा चेतावनी जारी गरेको छ। टेलिभिजन वक्तव्यमार्फत सैन्य कमान्डले भनेको छ, "यदि अमेरिकाले इरानसँग व्यवहार गर्दा कुनै पनि गल्ती गरेमा मध्यपूर्व क्षेत्रमा रहेका उसका सबै सैन्य आधार र हितहरूमाथि बिना कुनै संयम निरन्तर र पीडादायी आक्रमण गरिनेछ।"
