काठमाडौँ । काठमाडौं उपत्यकाका नेवार समुदायले परम्परागत रूपमा मनाउँदै आएको एक महिना लामो गुँला पर्व आज (भदौ २७) समापन भएको छ । बौद्ध धर्मावलम्बी नेवार समुदायका निम्ति धार्मिक, सांस्कृतिक तथा ऐतिहासिक महत्त्व बोकेको गुँला पर्व विशेष पूजा, बाजागाजा र धार्मिक यात्रासहित मनाइन्छ ।
नेपाल संवत्को गुँला महिनामा मनाइने यो पर्वका क्रममा बिहानै उठेर विभिन्न बौद्ध विहार, चैत्य तथा धार्मिकस्थलमा पुगेर पूजा–आराधना गर्ने परम्परा छ । विशेष गरी काठमाडौं, भक्तपुर र ललितपुरका विभिन्न स्थानबाट श्रद्धालु समूह बनाएर धार्मिक स्थलमा पुग्ने गरेका छन् ।
गुँला पर्वमा धाः, न्याकुँ तथा अरू परम्परागत बाजा बजाउँदै धार्मिक यात्रा गर्ने प्रचलन समेत छ । बाजागाजासहितको गुँला यात्रा यो पर्वको प्रमुख आकर्षणका रूपमा रहँदै आएको छ । श्रद्धालुले स्वयम्भू, बौद्ध तथा उपत्यकाका विभिन्न चैत्य र विहारमा पुगेर दीप प्रज्वलन, पूजा तथा प्रार्थना गर्ने गर्छन् ।
बौद्ध धर्मावलम्बीका निम्ति गुँला महिना विशेष साधना र धार्मिक गतिविधिको समय मानिन्छ । यो अवधिमा बिहानैदेखि धार्मिकस्थलमा पुग्ने, बुद्ध तथा विभिन्न देवीदेवताको पूजा, दान गर्ने र धार्मिक अनुष्ठानमा सहभागी हुने चलन छ । कतिपयले एक महिनासम्म नियमित रूपमा व्रत, पूजा तथा धार्मिक गतिविधिमा सहभागी भएर पर्व मनाउने गर्छन् ।
गुँला पर्वले नेवार समुदायको मौलिक संस्कृति, परम्परागत बाजा, धार्मिक आस्था र सामुदायिक एकतालाई पुस्तान्तरण गर्न महत्त्वपूर्ण भूमिका खेल्दै आएको छ । एक महिनादेखि सञ्चालन गरिएको धार्मिक गतिविधि पर्वको समापनसँगै औपचारिक रूपमा अन्त्य भएको छ । समापनका अवसरमा पनि विभिन्न विहार तथा चैत्यमा पूजा, प्रार्थना र धार्मिक अनुष्ठानमा सहभागी हुँदै श्रद्धालुले सुख, शान्ति र समृद्धिको कामना गरेका छन् ।
