काठमाडाैं। अमेरिकी युद्धपोतलाई लक्षित गरी दुई पटक आक्रमण गरिएपछि त्यसको जबाफमा अमेरिकी सेनाले इरानका पाँचवटा तेल ट्याङ्करमाथि आक्रमण गरेको अमेरिकी सेन्ट्रल कमाण्ड (सेन्टकम) ले जनाएको छ।
ओमानको खाडीमा इरानको 'इस्लामिक रिभोलुसनरी गार्ड कर्प्स' (आईआरजीसी) सँग सम्बद्ध चारवटा तेल ट्याङ्कर र इरानको खाडी तटमा रहेको प्रमुख तेल टर्मिनल 'खार्ग टापु'नजिकै अर्को एउटा ट्याङ्करलाई निशाना बनाइएको सेन्टकमले थपेको छ।
जबाफमा तेहरानले जोर्डनस्थित अमेरिकी सैन्य बेसलाई लक्षित गरी मिसाइल प्रहार गरेको छ। यद्यपि, जोर्डनले आफ्नो हवाई रक्षा प्रणालीमार्फत इरानका २० मध्ये १८ वटा मिसाइल खसालेको जनाएको छ।
गत फेब्रुअरी २८ मा अमेरिका र इस्राएलले इरानमाथि आक्रमण सुरु गरेको छ महिनाभन्दा बढी समय बितिसक्दा दुई देशबीचको दोहोरो आक्रमण पछिल्लो साता थप उत्कर्षमा पुगेको छ।
एसियाली बजारमा आज बिहानैदेखि कच्चा तेलको मूल्य बढेको छ। बेन्चमार्क ब्रेन्ट क्रुड १.५ प्रतिशतले बढेर प्रतिप्यारेल ९९.४१ डलर पुगेको छ भने अमेरिकी बजारमा तेलको मूल्य १.६ प्रतिशतले बढेर ९४.५५ डलर पुगेको छ।
इरानले जोर्डनतर्फ प्रहार गरेका मिसाइलमध्ये दुईवटा मानवरहित मानिस नबस्ने क्षेत्रमा खसेको जोर्डनी सशस्त्र बलका आधिकारिक प्रवक्ताले बताएका छन्।
इरानले थप प्रतिशोधपूर्ण आक्रमणको चेतावनी दिँदै कुवेत र बहराइनका बन्दरगाह नजिक रहेका अमेरिकी सम्बद्ध ट्याङ्करका चालक दललाई "आफ्ना जहाजहरू तुरुन्तै छोड्न, चाहे ती लङ्गर हालेर बसेका हुन् वा बन्दरगाहमा, किनकि तिनलाई निशाना बनाइनेछ" भनेर आग्रह गरेको छ।
इरानले अमेरिकी युद्धपोतमाथि ब्यालिस्टिक मिसाइल प्रहार गरेपछि यो पछिल्लो तनाव सिर्जना भएको हो। सेन्टकमले ती मिसाइलहरूलाई सफल रूपमा असफल पारिएको र आक्रमणमा कुनै पनि अमेरिकी सैनिकलाई क्षति नपुगेको जनाएको छ।
जबाफमा अमेरिकाले आफूले निशाना बनाएका पाँचवटा इरानी तेल ट्याङ्करहरू "आईआरजीसी र उसका क्षेत्रीय प्रतिनिधिहरूलाई आर्थिक सहयोग पुर्याउने अर्बौँ डलरको छाया सञ्जाल (स्याडो नेटवर्क) को हिस्सा" भएको बताएको छ।
अमेरिकी आक्रमणको पछिल्लो शृङ्खलामा इरानी ट्याङ्करलाई निशाना बनाइएको 'खार्ग टापु' इरानको तेल निर्यात गर्ने मुख्य टर्मिनल हो। देशको करिब ९० प्रतिशत कच्चा तेल जमिनबाट पाइपमार्फत यही टापुमा ल्याएर ओसारपसार गरिन्छ।
क्षेत्रीय असुरक्षाका कारण तेलको मूल्यमा थप दबाब परेको छ।
मंगलवार नै, येमेनको इरान समर्थित हुथी समूहले साउदी अरेबियाका ऊर्जा संरचना र नागरिक पूर्वाधारमा आक्रमण गर्दा ७३ जना घाइते भएको साउदी अधिकारीहरूले बताएका छन्। ड्रोन र मिसाइल आक्रमणका कारण तेल प्रशोधन केन्द्र तथा संरचनाहरूमा आगलागी भएपछि सञ्चालन अस्थायी रूपमा स्थगित गरिएको साउदी सैन्य तथा ऊर्जा मन्त्रालयले जनाएको छ।
अमेरिका र इरानबीचको पछिल्लो दोहोरो आक्रमणबारे पत्रकारहरूले सोधेको प्रश्नमा अमेरिकी विदेशमन्त्री मार्को रुबियोले स्थिति "सजिलै बुझ्न सकिने" बताएका छन्।
कोलम्बिया भ्रमणका क्रममा पत्रकारहरूसँग कुरा गर्दै रुबियोले भने, "इरानले अमेरिकी नौसैनिक जहाजहरूमा प्रहार गर्ने प्रयास जारी राखेको छ। र, प्रत्येक पटक उनीहरूले त्यसो गर्दा वा गर्ने प्रयास गर्दा, उनीहरूले आफ्ना ट्याङ्करहरू गुमाउनेछन्। मलाई लाग्छ आज पनि तपाईँहरूले त्यही देख्नुहुनेछ।"
मङ्गलवार अमेरिकी आक्रमण हुनुभन्दा केही घण्टाअघि इरानी नौसेनाले हर्मुजको जलडमरूमध्यमा अमेरिकाको मानवरहित पनडुब्बी नियन्त्रणमा लिएको दाबी गरेको थियो।
सेन्टकमका प्रवक्ता तथा अमेरिकी नौसेनाका क्याप्टेन टिम हकिन्सले "अमेरिकी सेनाद्वारा सञ्चालित अन्डरवाटर ड्रोन एक दिनअघि प्राविधिक खराबीका कारण बिग्रिएको" र त्यो "चालू अपरेसनको सहयोगमा" क्षेत्रीय जलक्षेत्रको सर्भेक्षण गर्न प्रयोग गरिएको बताएका छन्।
सो बिग्रिएको ड्रोन "पुरानो मोडलको भएको र त्यसले कुनै संवेदनशील तथ्याङ्क सङ्कलन नगरेको वा कुनै गोप्य सोनार वा राडार उपकरण नबोकेको" उनले बताए। साथै क्षेत्रीय जलक्षेत्रमा अमेरिकी अपरेसनहरू जारी रहेको पनि उनले स्पष्ट पारे।
