_20260813110012.JPG)
नारायणगढ (चितवन)। चितवनका युवाहरूले उद्यमशीलतालाई राजनीतिसँग जोड्नुपर्नेमा जोड दिएका छन्।
अन्तर्राष्ट्रिय युवा दिवसको अवसरमा राष्ट्रिय स्वतन्त्र पार्टी (रास्वपा) चितवनद्वारा आयोजित कार्यक्रममा ‘मेरो पुस्ताको राजनीति कस्तो हुनुपर्छ?’ विषयक वक्तृत्वकला, ‘कृषि उद्यमशीलता र युवा समृद्ध नेपालको आधार’ विषयक विचार-विमर्श तथा सांसदसँग युवा संवाद कार्यक्रमका सहभागीहरूले उद्यमशीलता बिनाको राजनीतिले समृद्धि नल्याउने सुझाव दिएका हुन्।
वक्तृत्वकलामा सहभागी १० जना युवाले भाषणमा मात्र सीमित रहने राजनीति नभई परिणाममुखी, प्रविधिमैत्री र उद्यमशील राजनीतिक संस्कार खोजेको धारणा व्यक्त गरे।
राजनीतिलाई जनताको सेवा गर्ने माध्यम बनाउनुपर्ने जनाउँदै उनीहरूले राजनीतिमा युवा सहभागिता मात्र नभई नीति निर्माण र कार्यान्वयनमा समेत युवाको अर्थपूर्ण भूमिका सुनिश्चित गर्नुपर्ने बताए। प्रविधिमैत्री सेवा, चुस्त प्रशासन, पारदर्शिता र जवाफदेहिता अहिलेको मुख्य आवश्यकता भएको भन्दै राजनीति फोहोरी खेल नभई जनताको माया र विश्वास प्राप्त गर्ने माध्यम बन्नुपर्ने उनीहरूको भनाइ थियो। 'जेनजी' पुस्ताले चाहेको परिवर्तन प्रविधि, उद्यमशीलता र अवसरसँग जोडिएको सहभागीहरूले बताए।
राजनीतिमा सहभागिता मात्र खोजेर नपुग्ने भन्दै नीति तथा नियम निर्माणमा समेत आफ्नो भूमिका स्थापित गर्नुपर्ने, राजनीतिमा पारदर्शिता, जवाफदेहिता, समावेशिता र सशक्तीकरणलाई प्राथमिकता दिनुपर्ने, प्रविधिको पहुँच सबै नागरिकसम्म पुर्याउनुपर्ने, आगामी पुस्तालाई सहयोग पुग्ने नीति बनाउनुपर्ने तथा सरकारलाई पूर्ण रूपमा डिजिटल र पारदर्शी बनाउनुपर्ने सहभागीहरूको माग थियो। त्यसैगरी, शिक्षा जीवनका समस्या समाधान गर्न सक्ने खालको हुनुपर्ने, अनुसन्धानमा लगानी बढाउनुपर्ने तथा स्वास्थ्य क्षेत्रलाई प्राथमिकता दिनुपर्ने विषयमा युवाहरूले जोड दिए।
रोजगारीका लागि विदेशिनुपर्ने बाध्यताको अन्त्य गर्दै ‘रेमिट्यान्स’मा मात्र निर्भर नभई स्वदेशमै उद्यमशीलता र रोजगारीका अवसर सिर्जना गर्नुपर्ने धारणा सहभागीहरूले राखेका थिए। १० जना युवाको सहभागिता रहेको वक्तृत्वकला प्रतियोगितामा अमृत ढकाल प्रथम, निरिता पौडेल द्वितीय र आयुस्मा श्रेष्ठ तृतीय भएका थिए।
कार्यक्रममा पत्रकार विवेक पोखरेलले कृषिविज्ञ डा. भानेश्वर पोखरेल, भवानी डेरीका सञ्चालक सुवास पौडेल तथा चितवनमा सयपत्रीलगायत फूलको बगैँचाबाट सफल व्यवसाय सञ्चालन गर्दै आएकी सुजाता देवकोटासँग कृषि उद्यमशीलताका विषयमा विचार-विमर्श गरेका थिए।
उनीहरूले कृषिलाई सम्मानित व्यवसायका रूपमा विकास गर्न, आधुनिक प्रविधि, अनुसन्धान र बजार व्यवस्थापनमा लगानी बढाउन तथा युवा र शिक्षित जनशक्तिलाई कृषि उद्यमशीलतामा जोडेर आत्मनिर्भर बनाउनुपर्नेमा जोड दिएका थिए।
चितवन क्षेत्र नं. १ का सांसद तथा राज्य व्यवस्था तथा सुशासन समितिका सभापति हरि ढकालले युवाहरूले काम गर्दै जाँदा हुने त्रुटि सच्याउँदै अघि बढ्नुपर्ने बताए। गल्ती नै गर्न हुँदैन भन्ने सोच राख्नुभन्दा पनि गल्तीबाट सिकेर लगनशीलताका साथ अघि बढ्नुपर्नेमा ढकालले जोड दिए। काम गर्नेहरूका लागि सिर्जनात्मक खबरदारी आवश्यक रहेको जनाउँदै ढकालले खबरदारी, कार्यसम्पादन र भाषण फरक विषय भएको उल्लेख गरे। राजनीतिक नेतृत्वले भाषणभन्दा काम र नतिजामा ध्यान दिनुपर्ने ढकालको भनाइ थियो।
यसैगरी, सांसद प्रभा ढकालले स्थानीय तहलाई थप जवाफदेही बनाउन आवश्यक रहेको बताइन्। सांसदहरू नीति तथा नियम निर्माणको काममा केन्द्रित हुने गरेको र आवश्यकताअनुसार सम्बन्धित विषयमा आफ्नो भूमिका निर्वाह गर्दै आएको प्रभा ढकालको भनाइ थियो।
रास्वपा चितवनका जिल्ला सभापति इन्जिनियर मिनिमाधव खनालको सभापतित्वमा सम्पन्न कार्यक्रममा रास्वपा केन्द्रीय सदस्य सविना विक, आकाक्षा पोखरेल र पवित्रा थापा, जिल्ला सचिव तेजेन्द्रप्रसाद पौडेल, उपसभापति निर्मला गिरी, जिल्ला सहसचिव कुशल पाठक, केन्द्रीय महाधिवेशन प्रतिनिधि, प्रदेश सदस्य, क्षेत्रीय सभापति, जिल्ला कार्यसमिति तथा पालिका र वडा प्रतिनिधिलगायतको सहभागिता रहेको थियो।
