काठमाडाैं। कैलालीको इलाका प्रहरी कार्यालय सुखडका इन्चार्ज एवं प्रहरी नायब उपरीक्षक (डीएसपी) प्रसन्नराज चौधरी सार्वजनिक कार्यक्रममा दिएको विवादास्पद अभिव्यक्तिका कारण छानबिनको दायरामा परेका छन्।
घोडाघोडी नगरपालिका–५ को दरखमा आयोजित लागुऔषधसम्बन्धी सचेतनामूलक कार्यक्रममा प्रधानमन्त्री वालेन्द्र शाह (बालेन) र पूर्वप्रधानमन्त्री केपी शर्मा ओलीको नाम जोडेर दिएको राजनीतिक अभिव्यक्तिको भिडियो सामाजिक सञ्जालमा भाइरल भएपछि जिल्ला प्रहरी कार्यालय कैलालीले उनलाई सोधपुछका लागि सदरमुकाम छाड्न निर्देशन दिँदै जिल्ला झिकाएको हो।
उक्त कार्यक्रममा बोल्दै डीएसपी चौधरीले आफूहरू कसैको प्रभावमा नरहेको दाबी गर्ने क्रममा 'हामी बालेनको पुलिस पनि होइनौँ, नेपाल पुलिस हौँ' भन्दै अन्याय र अत्याचारमा परेकालाई न्याय दिलाउने प्रहरी भएको बताएका थिए। उनले थप अगाडि बढ्दै 'केपी ओलीलाई थुन्ने पुलिस पनि यही हो' भन्ने जस्ता गम्भीर राजनीतिक टिप्पणी समेत गरेका थिए। बर्दीधारी प्रहरी अधिकृतले देशको बहालवाला प्रधानमन्त्री र प्रमुख राजनीतिक दलका नेताहरूका बारेमा यसरी सार्वजनिक रूपमा टिप्पणी गरेपछि संगठनभित्र र बाहिर उनको तीव्र आलोचना भइरहेको छ।
सोही कार्यक्रममा उनले आफूहरू भोट हालेर, टीका लगाएर वा दारु–भाँत खाएर पदमा आएको नभई कडा प्रतिस्पर्धाबाट छनोट भएर आएको भन्दै जनप्रतिनिधिप्रति पनि व्यङ्ग्य गरेका थिए। नेपाल प्रहरीले लगाएको बर्दी राष्ट्रपतिले समेत लगाउन नपाउने भन्दै उनले आफ्नो भनाइ मन परे ताली बजाउन विद्यार्थीहरूलाई आग्रह गरेका थिए। उनले भिडियो रेकर्ड नगर्न र सार्वजनिक नगर्न आग्रह गरे पनि उक्त क्लिप सामाजिक सञ्जालमा बाहिरिएपछि प्रहरी प्रधान कार्यालयले यसलाई गम्भीर अनुशासन उल्लंघनको रूपमा लिएको छ।
कैलालीका प्रमुख प्रहरी उपरीक्षक (एसपी) नरेन्द्र चन्दले चौधरीलाई सोधपुछका लागि जिल्ला बोलाइएको पुष्टि गरेका छन्। प्रहरी स्रोतका अनुसार उनीमाथि यो पछिल्लो अभिव्यक्ति मात्र नभई उनको कार्यशैली, अनुशासन र विगतका गतिविधिहरूका बारेमा स्थानीय तहदेखि केन्द्रसम्म परेका विभिन्न उजुरीका आधारमा समेत छानबिन सुरु गरिएको हो। यसअघि पनि संगठनको नीति–निर्देशन पालना नगरेको विषयमा उनीसँग स्पष्टीकरण सोधिएको थियो भने आफैँ बजारमा पुगेर व्यापारीका सामान जफत गर्ने र पछि बिना कानुनी प्रक्रिया फिर्ता गरेको आरोप समेत उनीमाथि लागेको छ।
प्रहरी प्रधान कार्यालयबाट प्राप्त पत्रका आधारमा जिल्ला प्रहरी कार्यालय कैलालीले迫 उनको कार्यशैली र अभिव्यक्तिका विषयमा प्राप्त सबै गुनासाहरूलाई एकमुष्ट रूपमा हेरिरहेको छ। प्रहरी नेतृत्वले यो सामान्य सोधपुछ मात्र नभई चेन अफ कमान्ड र संगठनको आचारसंहिता उल्लंघनको गम्भीर पाटो भएकाले यस विषयमा विस्तृत अनुसन्धान गरेर माथिल्लो निकायमा प्रतिवेदन पठाउने तयारी गरेको छ।
_20260707203158.jpg)
