काठमाडौं । सर्वोच्च अदालतले नेकपा एमालेका उपाध्यक्ष एवं पूर्वउपप्रधानमन्त्री विष्णु पौडेल जोडिएको एक विवादमा गम्भीर चासो देखाउँदै विशेष अदालतमा विचाराधीन सम्पत्ति शुद्धीकरण मुद्दाको सक्कल मिसिल झिकाउन आदेश दिएको छ।
न्यायाधीशद्वय टेकप्रसाद ढुङ्गाना र मेघराज पोखरेलको संयुक्त इजलासले सोमबार उक्त आदेश जारी गरेको हो। पौडेलकी पत्नी दोमाया पौडेलका तर्फबाट दायर गरिएको बन्दीप्रत्यक्षीकरण रिटमाथि सुनुवाइ गर्दै सर्वोच्चले यस्तो निर्णय गरेको हो। अदालतले सुलभ अग्रवाल र दीपक भट्ट प्रतिवादी रहेको सम्पत्ति शुद्धीकरण मुद्दासँग सम्बन्धित सम्पूर्ण तथ्य, प्रमाण र कागजातहरूको विस्तृत अध्ययनका लागि विशेष अदालतबाट सक्कल फाइल नै मगाउने आदेश दिएको छ।
सर्वोच्च अदालतले विशेष अदालतमा विचाराधीन मुद्दा र बन्दीप्रत्यक्षीकरण रिटमा उठाइएका कानुनी सवालहरू एकापसमा अन्तरसम्बन्धित रहेको निष्कर्ष निकालेको छ। पूर्ण न्यायिक निरूपणका लागि ती प्रमाणहरू अनिवार्य देखिएकाले सक्कल मिसिल माग गरिएको अदालतले जनाएको छ।
विशेष अदालतबाट उक्त फाइल प्राप्त भई त्यसमा रहेका कागजात र प्रमाणहरूको गहन अध्ययन गरिएपछि मात्र यस रिटमाथिको थप सुनुवाइ प्रक्रिया अघि बढ्नेछ।
